ਪੰਜਾਬ ਪੁਲਿਸ ਦਾ ਮੁਲਾਜ਼ਮ ਸ਼ੱਕੀ ਹਾਲਾਤ ’ਚ ਲਾਪਤਾ, ਖ਼ੂਨ ਨਾਲ ਲਿੱਬੜੀ ਖੜ੍ਹੀ ਮਿਲੀ ਲਾਵਾਰਿਸ ਕਾਰ

ਪੰਜਾਬ ਪੁਲਿਸ ਮੁਲਾਜ਼ਮ ਸਤਿੰਦਰ ਸਿੰਘ ਘਰ ਪਰਤਦੇ ਸਮੇਂ ਲਾਪਤਾ ਹੋ ਗਿਆ ਹੈ। ਸਤਿੰਦਰ ਦੀ ਕਾਰ ਸਮਾਣਾ ਕੋਲ ਪਿੰਡ ਭਾਨਰਾ ਕੋਲ ਖੜ੍ਹੀ ਮਿਲੀ ਹੈ, ਜਿਸ ਵਿਚ ਕੁਝ ਖੂਨ ਦੇ ਨਿਸ਼ਾਨ ਵੀ ਹਨ। ਸਤਿੰਦਰ ਸਿੰਘ ਮੁਹਾਲੀ ਐਸਐਯਪੀ ਸੰਦੀਪ ਕੁਮਾਰ ਦਾ ਗੰਨਮੈਨ ਹੈ।

ਸਤਿੰਦਰ ਦੇ ਮਾਮਾ ਪ੍ਰਤਾਪ ਸਿੰਘ ਨੇ ਦੱਸਿਆ ਕਿ ਉਹ ਕਰੀਬ 9 ਸਾਲ ਪਹਿਲਾਂ ਪੁਲਿਸ ਵਿਚ ਭਰਤੀ ਹੋਇਆ ਸੀ। ਕਰੀਬ 10 ਦਿਨ ਬਾਅਦ ਡਿਊਟੀ ਤੋਂ ਘਰ ਆਉਂਦਾ ਸੀ ਤੇ ਮੰਗਲਵਾਰ ਵੀ ਆਪਣੇ ਕਾਰ ਵਿਚ ਸਵਾਰ ਹੋ ਕੇ ਘਰ ਆ ਰਿਹਾ ਸੀ। ਉਨਾਂ ਚੱਲਣ ਤੋਂ ਪਹਿਲਾਂ ਆਪਣੀ ਪਤਨੀ ਨੂੰ ਮੋਬਾਈਲ ਲੋਕੇਸ਼ਨ ਭੇਜ ਕੇ ਘਰ ਆਉਣ ਬਾਰੇ ਜਾਣਕਾਰੀ ਦਿੱਤੀ ਸੀ। ਰਾਤ ਕਰੀਬ 11ਵਜੇ ਉਸਦੀ ਪਤਨੀ ਨੇ ਸਤਿੰਦਰ ਨੂੰ ਫੋਨ ਕੀਤਾ ਤਾਂ ਉਸਨੇ ਦੱਸਿਆ ਕਿ ਰਾਜਪੁਰਾ ਪੁੱਜ ਗਿਆ ਹੈ। 12 ਵਜੇ ਤੱਕ ਵੀ ਘਰ ਨਾ ਪੁੱਜਿਆ ਤਾਂ ਫਿਰ ਫੋਨ ਕੀਤਾ ਤਾਂ ਫੋਨ ਬੰਦ ਸੀ ਜਿਸ ਤੋਂ ਬਾਅਦ ਪਰਿਾਵਰ ਨੇ ਸਤਿੰਦਰ ਦੀ ਭਾਲ ਸ਼ੁਰੂ ਕੀਤੀ। ਇਸੇ ਦੌਰਾਨ ਉਸਦੀ ਕਾਰ ਪਿੰਡ ਭਾਨਰਾ ਕੋਲ ਲਾਵਾਰਿਸ ਖੜ੍ਹੀ ਮਿਲੀ। ਸਤਿੰਦਰ ਤੇ ਉਸਦਾ ਫੋਨ ਦੋਵੇਂ ਕਾਰ ਵਿਚ ਨਹੀਂ ਸੀ ਤੇ ਸੀਟ ’ਤੇ ਖੂਨ ਦੇ ਛਿੱਟੇ ਲੱਗੇ ਹੋਏ ਸਨ। ਇਸ ਸਬੰਧੀ ਸਮਾਣਾ ਡੀਐੱਸਪੀ ਫਤਿਹ ਸਿੰਘ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।