ਪਾਕਿਸਤਾਨ : ਰਾਜ ਕਪੂਰ – ਦਿਲੀਪ ਕੁਮਾਰ ਦੇ ਪੁਸ਼ਤੈਨੀ ਘਰ ਬਣਨਗੇ ਮਿਊਜ਼ੀਅਮ, ਸਰਕਾਰ ਨੇ ਜਾਰੀ ਕੀਤੇ 2.30 ਕਰੋੜ ਰੁਪਏ

ਇਸਲਾਮਾਬਾਦ : ਪਾਕਿਸਤਾਨ ਸਥਿਤ ਖੈਬਰ ਪਖਤੂਨਖਵਾ ਸੂਬੇ ਦੀ ਸਰਕਾਰ ਨੇ ਬਾਲੀਵੁਡ ਦੇ ਮਹਾਨ ਅਦਾਕਾਰ ਰਾਜ ਕਪੂਰ ਅਤੇ ਦਿਲੀਪ ਕੁਮਾਰ ਦੀ ਪੇਸ਼ਾਵਰ ‘ਚ ਮੌਜੂਦ ਪੁਸ਼ਤੈਨੀ ਹਵੇਲੀਆਂ ਨੂੰ ਖਰੀਦ ਉਨ੍ਹਾਂ ਨੂੰ ਅਜਾਇਬ-ਘਰ ‘ਚ ਤਬਦੀਲ ਕਰਨ ਲਈ 2.30 ਕਰੋੜ ਰੁਪਏ ਅਲਾਂਟ ਕੀਤੇ ਹਨ। ਇਹ ਰਾਸ਼ੀ ਪੁਰਾਤਤਵ ਵਿਭਾਗ ਨੇ ਪੇਸ਼ਾਵਰ ਦੇ ਡਿਪਟੀ ਕਮਿਸ਼ਨਰ ਨੂੰ ਸੌਂਪੀ ਹੈ। ਇਹ ਫੈਸਲਾ ਦੋਵੇਂ ਹਵੇਲੀਆਂ ਦੇ ਮੌਜੂਦਾ ਮਾਲਕਾਂ ਨੂੰ ਖਰੀਦ ਲਈ ਅੰਤਿਮ ਨੋਟਿਸ ਜਾਰੀ ਕਰਨ ਤੋਂ ਬਾਅਦ ਲਿਆ ਗਿਆ ਹੈ।

ਖੈਬਰ ਪਖਤੂਨਖਵਾ ਦੇ ਪੁਰਾਤਤਵ ਨਿਦੇਸ਼ਕ ਅਬਦੁਸ ਸਮਦ ਨੇ ਕਿਹਾ ਕਿ ਸਰਕਾਰ ਦੋਵੇਂ ਘਰਾਂ ਦਾ ਕਬਜ਼ ਲਵੇਗੀ ਅਤੇ ਢਾਂਚੇ ਨੂੰ ਉਨ੍ਹਾਂ ਦੇ ਪੁਰਾਣੇ ਸਵਰੂਪ ‘ਚ ਬਹਾਲ ਕਰਨ ਦਾ ਕੰਮ ਸ਼ੁਰੂ ਕਰੇਗੀ। ਉਨ੍ਹਾਂ ਨੇ ਕਿਹਾ ਕਿ ਸਰਕਾਰ ਦੋਵੇਂ ਇਮਾਰਤਾਂ ਨੂੰ ਰਾਖਵਾਂ ਕਰੇਗੀ ਤਾਂ ਕਿ ਲੋਕ ਫਿਲਮ ਉਦਯੋਗ ‘ਚ ਦਿਲੀਪ ਕੁਮਾਰ ਅਤੇ ਰਾਜ ਕਪੂਰ ਦੇ ਯੋਗਦਾਨ ਦੇ ਬਾਰੇ ‘ਚ ਜਾਣ ਸਕਣ। ਖੈਬਰ ਪਖਤੂਨਖਵਾ ਦੀ ਸਰਕਾਰ ਨੇ 6.25 ਮਰਲਿਆਂ ‘ਚ ਨਿਰਮਿਤ ਰਾਜ ਕਪੂਰ ਦੇ ਘਰ ਅਤੇ ਚਾਰ ਮਰਲਿਆਂ ‘ਚ ਬਣੇ ਦਿਲੀਪ ਕੁਮਾਰ ਦੇ ਘਰ ਲਈ 1.50 ਕਰੋੜ ਰੁਪਏ ਅਤੇ 80 ਲੱਖ ਰੁਪਏ ਕੀਮਤ ਤੈਅ ਕੀਤੀ ਹੈ।