ਨੇਪਾਲ ’ਚ ਹੜ੍ਹ ਪੀੜਤ ਦੀ ਲਾਸ਼ ਤੋਂ ਗਹਿਣੇ ਚੋਰੀ ਕਰਦਿਆਂ ਦੋ ਗ੍ਰਿਫ਼ਤਾਰ, ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਐਕਸ਼ਨ

ਨੇਪਾਲ ਪੁਲਿਸ ਨੇ ਚਿਤਵਨ ਵਿੱਚ 25 ਸਾਲਾ ਮਦਨ ਗੁਰੁੰਗ ਅਤੇ 38 ਸਾਲਾ ਉਮੇਸ਼ ਚੌਧਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਵੀਡੀਓ ਫੁਟੇਜ ਵਿੱਚ ਦੋਵਾਂ ਨੂੰ ਭੋਤੇਕੋਸ਼ੀ ਨਦੀ ਦੇ ਕਿਨਾਰੇ ਹੜ੍ਹ ਪੀੜਤ ਦੀ ਲਾਸ਼ ਤੋਂ ਵਾਲੀਆਂ (ਕੰਨਾਂ ਦੀਆਂ ਬਾਲੀਆਂ) ਚੋਰੀ ਕਰਦੇ ਹੋਏ ਦੇਖਿਆ ਗਿਆ ਸੀ।
ਇਹ ਕਲਿੱਪਸ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋਈਆਂ, ਜਿਸ ਨਾਲ ਲੋਕਾਂ ਵਿੱਚ ਭਾਰੀ ਰੋਹ ਫੈਲ ਗਿਆ। ਇਹ ਘਟਨਾ ਉਸ ਸਮੇਂ ਸਾਹਮਣੇ ਆਈ ਜਦੋਂ ਤਿੱਬਤ ਤੋਂ ਆਏ ਲੈਂਡਸਲਾਈਡ ਕਾਰਨ ਭਿਆਨਕ ਹੜ੍ਹ ਆਇਆ ਸੀ।
ਇਸ ਆਫ਼ਤ ਵਿੱਚ ਹੁਣ ਤੱਕ ਘੱਟੋ-ਘੱਟ 359 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਅਤੇ ਸੈਂਕੜੇ ਅਜੇ ਵੀ ਲਾਪਤਾ ਹਨ। ਚੱਲ ਰਹੇ ਬਚਾਅ ਅਤੇ ਰਾਹਤ ਕਾਰਜਾਂ ਦੌਰਾਨ ਵਾਪਰੀ ਇਸ ਘਿਨਾਉਣੀ ਕਾਰਵਾਈ ਨੇ ਪੂਰੇ ਨੇਪਾਲ ਵਿੱਚ ਗੁੱਸਾ ਫੈਲਾ ਦਿੱਤਾ ਹੈ।
ਨੇਪਾਲ ਪੁਲਿਸ ਨੇ ਦੋਸ਼ੀਆਂ ਦੇ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਆਮ ਲੋਕਾਂ ਨੇ ਸੋਸ਼ਲ ਮੀਡੀਆ ‘ਤੇ ਇਸ ਘਟਨਾ ਨੂੰ ਕਲਯੁਗ ਦੱਸਦਿਆਂ ਨਿੰਦਾ ਕੀਤੀ ਹੈ।
ਇਸ ਆਫ਼ਤ ਵਿੱਚ 20 ਤੋਂ ਵੱਧ ਪੁਲ ਅਤੇ ਕਰੀਬ 40 ਕਿਲੋਮੀਟਰ ਹਾਈਵੇਅ ਰੁੜ੍ਹ ਚੁੱਕੇ ਹਨ। ਇਸ ਨਾਲ ਕਈ ਇਲਾਕਿਆਂ ਦਾ ਮੁੱਖ ਖੇਤਰ ਨਾਲੋਂ ਸੰਪਰਕ ਟੁੱਟ ਗਿਆ ਹੈ ਅਤੇ ਜ਼ਿਆਦਾਤਰ ਰਾਹਤ ਤੇ ਬਚਾਅ ਕਾਰਜ ਹੈਲੀਕਾਪਟਰਾਂ ਦੀ ਮਦਦ ਨਾਲ ਚਲਾਏ ਜਾ ਰਹੇ ਹਨ। ਰਾਹਤ ਅਤੇ ਬਚਾਅ ਕਾਰਜਾਂ ਵਿੱਚ 13,295 ਸੁਰੱਖਿਆ ਕਰਮੀ ਤਾਇਨਾਤ ਕੀਤੇ ਗਏ ਹਨ।
ਉੱਥੇ ਹੀ, ਚੀਨ ਵੱਲੋਂ 141 ਬਚਾਅ ਕਰਮੀ ਲਗਾਏ ਗਏ ਹਨ। ਇਸ ਦੇ ਨਾਲ ਹੀ ਪੀਪਲਜ਼ ਲਿਬਰੇਸ਼ਨ ਆਰਮੀ (ਪੀ.ਐੱਲ.ਏ.) ਦੇ ਵੈਸਟਰਨ ਥੀਏਟਰ ਕਮਾਂਡ ਦੇ ਡਾਇਰੈਕਟਿੰਗ ਗਰੁੱਪ ਨੂੰ ਮੌਕੇ ‘ਤੇ ਭੇਜਿਆ ਗਿਆ ਹੈ।