ਦਿੱਲੀ ਮੇਅਰ ਚੋਣ : MCD ‘ਤੇ ਆਪ’ ਦਾ ਕਬਜ਼ਾ, ਕੌਂਸਲਰ ਸ਼ੈਲੀ ਓਬਰਾਏ ਬਣੀ ਦਿੱਲੀ ਦੀ ਨਵੀਂ ਮੇਅਰ

ਨਵੀਂ ਦਿੱਲੀ : ਦਿੱਲੀ ‘ਚ ਪਹਿਲੀ ਵਾਰ ਆਮ ਆਦਮੀ ਪਾਰਟੀ ਨੇ ਮੇਅਰ ਦੇ ਅਹੁਦੇ ‘ਤੇ ਜਿੱਤ ਹਾਸਲ ਕੀਤੀ ਹੈ। ਬੁੱਧਵਾਰ ਨੂੰ ਹੋਈ ਵੋਟਿੰਗ ‘ਚ ‘ਆਪ’ ਦੀ ਸ਼ੈਲੀ ਓਬਰਾਏ ਨੇ ਭਾਜਪਾ ਦੀ ਰੇਖਾ ਗੁਪਤਾ ਨੂੰ ਹਰਾਇਆ। ਚੋਣ ਵਿੱਚ ਕੁੱਲ 241 ਕੌਂਸਲਰਾਂ ਨੇ ਵੋਟ ਪਾਈ। ਇਸ ਦੇ ਨਾਲ ਹੀ 9 ਕਾਂਗਰਸੀ ਕੌਂਸਲਰਾਂ ਨੇ ਚੋਣ ਦਾ ਬਾਈਕਾਟ ਕੀਤਾ। ਐਮਸੀਡੀ ਚੋਣਾਂ ਲਈ ਅੱਜ ਸਵੇਰੇ 11.20 ਵਜੇ ਸਿਵਿਕ ਸੈਂਟਰ ਵਿੱਚ ਤਿੰਨ ਵਾਰ ਮੁਲਤਵੀ ਹੋਣ ਤੋਂ ਬਾਅਦ ਵੋਟਿੰਗ ਸ਼ੁਰੂ ਹੋਈ, ਜੋ ਕਰੀਬ ਦੋ ਘੰਟੇ ਚੱਲੀ।ਮੇਅਰ ਦੇ ਅਹੁਦੇ ਲਈ ‘ਆਪ’ ਦੀ ਸ਼ੈਲੀ ਓਬਰਾਏ ਅਤੇ ਭਾਜਪਾ ਦੀ ਰੇਖਾ ਗੁਪਤਾ ਵਿਚਾਲੇ ਮੁਕਾਬਲਾ ਸੀ। ‘ਆਪ’ ਦੇ ਆਸ਼ੂ ਠਾਕੁਰ ਵੀ ਤੀਜੇ ਉਮੀਦਵਾਰ ਵਜੋਂ ਚੋਣ ਮੈਦਾਨ ਵਿੱਚ ਸਨ।

ਦਿੱਲੀ ਵਿੱਚ ਐਮਸੀਡੀ ਚੋਣਾਂ 4 ਦਸੰਬਰ ਨੂੰ ਹੋਈਆਂ ਸਨ, ਜਦੋਂ ਕਿ ਉਨ੍ਹਾਂ ਦੇ ਨਤੀਜੇ 8 ਦਸੰਬਰ ਨੂੰ ਆਏ ਸਨ। MCD ‘ਚ 15 ਸਾਲ ਬਾਅਦ ਵੀ ਭਾਜਪਾ ਨੂੰ ਬਹੁਮਤ ਨਹੀਂ ਮਿਲਿਆ।ਸਵੇਰੇ 11 ਵਜੇ ਵੋਟਿੰਗ ਸ਼ੁਰੂ ਹੋਣ ਤੋਂ ਪਹਿਲਾਂ ਸਿਵਿਕ ਸੈਂਟਰ ‘ਚ ਹੰਗਾਮਾ ਵਰਗਾ ਮਾਹੌਲ ਦੇਖਣ ਨੂੰ ਮਿਲਿਆ। ‘ਆਪ’ ਕੌਂਸਲਰਾਂ ਦੀ ਪੁਲੀਸ ਨਾਲ ਝੜਪ ਵੀ ਹੋਈ। ‘ਆਪ’ ਦੇ ਕਾਰਪੋਰੇਟਰ ਭਾਜਪਾ ਵਿਧਾਇਕ ਵਿਜੇਂਦਰ ਗੁਪਤਾ ਦੇ ਸਦਨ ‘ਚ ਦਾਖ਼ਲ ਹੋਣ ਦਾ ਵਿਰੋਧ ਕਰ ਰਹੇ ਸਨ। ਹੰਗਾਮੇ ਦੇ ਖਦਸ਼ੇ ਦੇ ਮੱਦੇਨਜ਼ਰ ਸਦਨ ਵਿੱਚ ਸੁਰੱਖਿਆ ਦੇ ਪੁਖਤਾ ਪ੍ਰਬੰਧ ਕੀਤੇ ਗਏ ਸਨ। ਸਦਨ ਵਿੱਚ ਐਸਐਸਬੀ ਦੇ ਜਵਾਨ ਤਾਇਨਾਤ ਸਨ।250 ਸੀਟਾਂ ਵਾਲੇ ਸਦਨ ਵਿੱਚ ਮੇਅਰ ਦੀ ਚੋਣ ਲਈ 138 ਵੋਟਾਂ ਦੀ ਲੋੜ ਸੀ।

‘ਆਪ’ ਦੇ 151 ਕਾਰਪੋਰੇਟਰ ਹਨ, ਜਿਨ੍ਹਾਂ ‘ਚੋਂ 134 ਚੁਣੇ ਗਏ ਹਨ। 13 ਵਿਧਾਇਕ, 3 ਸੰਸਦ ਮੈਂਬਰ ਅਤੇ ਇੱਕ ਆਜ਼ਾਦ ਕੌਂਸਲਰ ਸਮਰਥਨ ਵਿੱਚ ਰਹੇ। ਜਦੋਂ ਕਿ ਭਾਜਪਾ ਦੇ ਹੱਕ ਵਿੱਚ 112 ਕਾਰਪੋਰੇਟਰ ਸਨ, ਜਿਨ੍ਹਾਂ ਵਿੱਚ 104 ਚੁਣੇ ਹੋਏ ਕਾਰਪੋਰੇਟਰ, 7 ਸੰਸਦ ਮੈਂਬਰ ਅਤੇ 1 ਵਿਧਾਇਕ ਸ਼ਾਮਲ ਸਨ। 9 ਕਾਂਗਰਸੀ ਕੌਂਸਲਰਾਂ ਨੇ ਵੋਟਿੰਗ ਦਾ ਬਾਈਕਾਟ ਕੀਤਾ।