ਕੁੰਭ ਮੇਲੇ ਵਿੱਚ ਬੰਬ ਧਮਕੀ ਦੇਣ ਵਾਲੇ ਇੱਕ ਨੌਜਵਾਨ ਨੂੰ ਕੀਤਾ ਗ੍ਰਿਫਤਾਰ

ਉੱਤਰ ਪ੍ਰਦੇਸ਼ ਦੇ ਪ੍ਰਯਾਗਰਾਜ ‘ਚ ਹੋਣ ਵਾਲੇ ਮਹਾ ਕੁੰਭ ਮੇਲੇ ਨੂੰ ਲੈ ਕੇ ਪੁਲਸ ਅਤੇ ਖੁਫੀਆ ਏਜੰਸੀਆਂ ਨੂੰ ਹਰ ਰੋਜ਼ ਧਮਕੀ ਭਰੇ ਪੱਤਰ ਜਾਂ ਸੰਦੇਸ਼ ਮਿਲ ਰਹੇ ਹਨ। ਹਾਲ ਹੀ ‘ਚ ਅਜਿਹਾ ਹੀ ਇਕ ਇੰਸਟਾਗ੍ਰਾਮ ਮੈਸੇਜ ਪੁਲਸ ਨੇ ਟਰੇਸ ਕੀਤਾ ਸੀ। ਇਸ ਵਿੱਚ ਕੁੰਭ ਮੇਲੇ ਵਿੱਚ ਬੰਬ ਧਮਾਕਾ ਕਰਕੇ 1000 ਲੋਕਾਂ ਨੂੰ ਮਾਰਨ ਦੀ ਧਮਕੀ ਦਿੱਤੀ ਗਈ ਸੀ। ਇਸ ਮੈਸੇਜ ਨੂੰ ਦੇਖ ਕੇ ਪੁਲਿਸ ਹਰਕਤ ‘ਚ ਆ ਗਈ ਅਤੇ ਮਾਮਲੇ ਦੀ ਜਾਂਚ ਕਰਦੇ ਹੋਏ ਯੂਪੀ ਪੁਲਿਸ ਨੇ ਬਿਹਾਰ ਦੀ ਪੂਰਨੀਆ ਪੁਲਿਸ ਦੇ ਨਾਲ ਮਿਲ ਕੇ ਇੱਕ ਨੌਜਵਾਨ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਸ ਵਿੱਚ ਭਵਾਨੀਪੁਰ ਥਾਣਾ ਖੇਤਰ ਦੇ ਸ਼ਹੀਦਗੰਜ ਵਿੱਚ ਰਹਿਣ ਵਾਲੇ ਇੱਕ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲੀਸ ਅਨੁਸਾਰ ਨੌਜਵਾਨ ਦੀ ਪਛਾਣ ਆਯੂਸ਼ ਜੈਸਵਾਲ ਉਰਫ਼ ਗੋਲੂ ਵਜੋਂ ਹੋਈ ਹੈ। ਆਯੁਸ਼ ਨੇ ਇਹ ਧਮਕੀ ਇੰਸਟਾਗ੍ਰਾਮ ‘ਤੇ ‘ਨੱਸਰ ਪਠਾਨ’ ਦੇ ਫਰਜ਼ੀ ਨਾਂ ਨਾਲ ਦਿੱਤੀ ਸੀ। ਉਸ ਨੇ ਮਹਾਕੁੰਭ ਮੇਲੇ ਨੂੰ ਵਿਸਫੋਟ ਕਰਨ ਅਤੇ 1000 ਲੋਕਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਸੀ, ਪੁਲਿਸ ਦੇ ਅਨੁਸਾਰ, ਆਪਣੇ ਦੋਸਤ ਨੂੰ ਫਸਾਉਣ ਲਈ, ਦੋਸ਼ੀ ਆਯੂਸ਼ ਨੇ 31 ਦਸੰਬਰ ਨੂੰ ‘ਨਾਸਰ_ਕੱਟਰ_ਮੀਆ’ ਨਾਮ ਨਾਲ ਇੱਕ ਇੰਸਟਾਗ੍ਰਾਮ ਖਾਤਾ ਬਣਾਇਆ ਸੀ। ਉਸ ਨੇ ਆਸ ਪ੍ਰਗਟਾਈ ਕਿ ਪੁਲੀਸ ਇਸ ਧਮਕੀ ਨੂੰ ਗੰਭੀਰਤਾ ਨਾਲ ਲਵੇਗੀ ਅਤੇ ਉਸ ਦੇ ਦੋਸਤ ਨੂੰ ਗ੍ਰਿਫ਼ਤਾਰ ਕਰੇਗੀ। ਇੰਸਟਾਗ੍ਰਾਮ ‘ਤੇ ਮੈਸੇਜ ਪੋਸਟ ਕਰਨ ਤੋਂ ਬਾਅਦ ਦੋਸ਼ੀ ਨੇ ਆਪਣਾ ਅਕਾਊਂਟ ਵੀ ਡਿਲੀਟ ਕਰ ਦਿੱਤਾ। ਹਾਲਾਂਕਿ ਮਾਮਲੇ ਦੀ ਜਾਂਚ ਕਰਦੇ ਹੋਏ ਯੂਪੀ ਪੁਲਿਸ ਨੇ ਅਸਲ ਮੁਲਜ਼ਮਾਂ ਨੂੰ ਫੜ ਲਿਆ ਹੈ।