ਕਮਜ਼ੋਰ ਦਾਣੇ ਬਾਣੇ ਕੇਂਦਰ ਸਰਕਾਰ ਦੇ ਫੈਸਲੇ ਦਾ ਵਿਰੋਧ

ਪਟਿਆਲਾ: ਕੇਂਦਰ ਸਰਕਾਰ ਨੇ ਪੰਜਾਬ ਦੇ ਕਿਸਾਨ ਨੂੰ ਹੋਰ ਮੁਸੀਬਤ ‘ਚ ਫ਼ਸਾ ਦਿੱਤਾ ਹੈ। ਅੱਜ ਕੇਂਦਰ ਸਰਕਾਰ ਦੇ ਵੱਖ ਵੱਖ ਮਹਿਕਮਿਆ ਨੇ ਅੱਜ ਤੋਂ ਮੰਡੀਆਂ ‘ਚ ਆ ਰਹੀ ਕਣਕ ਦੇ ਮਾਜੂ (ਕਮਜੋਰ) ਦਾਣੇ ਦੇ ਪ੍ਰਸੰਗ ਜੋ ਸਿਫ਼ਾਰਿਸ਼ਾਂ ਕੀਤੀਆ ਹਨ ਉਸ ਨਾਲ ਕਿਸਾਨਾਂ, ਜਿਨਾਂ ਦੀ ਕਣਕ ਦੀ ਫ਼ਸਲ ਦਾ ਝਾੜ੍ਹ ਬੇਮੌਸਮੀਆਂ ਬਾਰਸ਼ਾਂ, ਝੱਖੜਾਂ ਅਤੇ ਗੜ੍ਹਿਆਂ ਕਰਕੇ ਪਹਿਲਾਂ ਹੀ ਘੱਟ ਨਿਕਲਿਆ ਹੈ, ਉਹਨਾਂ ਨਾਲ ਸ਼ਰ੍ਹੇਆਮ ਧੱਕਾ ਕੀਤਾ ਹੈ। ਕਿਸਾਨ ਕਈ ਕਈ ਦਿਨਾਂ ਤੋਂ ਮੰਡੀਆਂ ‘ਚ ਰੁਲ ਰਹੇ ਹਨ, ਇੰਸਪੈਕਟਰ ਉਡੀਕਣ ਲਈ ਕਹਿ ਕੇ ਚਲਾ ਜਾਂਦਾ ਹੈ।          ਖੁਰਾਕ ਏਜੰਸੀਆਂ ਦੇ ਅਧਿਕਾਰੀਆਂ ਤੋਂ ਪਤਾ ਕਰਨ ਉਪਰੰਤ ਕ੍ਰਾਂਤੀਕਾਰੀ ਕਿਸਾਨ ਯੂਨੀਅਨ, ਪੰਜਾਬ ਇਸ ਫੈਸਲੇ, ਜਿਸ ਅਨੁਸਾਰ, ਕੇਂਦਰ ਸਰਕਾਰ ਦੀਆਂ ਹਦਾਇਤਾਂ ਮੁਤਾਬਿਕ ਜੇਕਰ ਕਮਜੋਰ ਦਾਣਾ 6 ਤੋਂ 8 ਪ੍ਰਤੀਸ਼ੱਤ ਹੈ ਤਾਂ 4 ਰੁਪਏ, 81 ਪੈਸੇ, ਜੇਕਰ ਕਮਜੋਰ ਦਾਣਾ 8 ਤੋਂ 10 ਪ੍ਰਤੀਸ਼ੱਤ ਹੈ ਤਾਂ 9 ਰੁਪਏ 62 ਪੈਸੇ, 10 ਤੋਂ 12 ਪ੍ਰਤੀਸ਼ੱਤ ਤੱਕ 14 ਰੁਪਏ43 ਪੈਸੇ ਜੇਕਰ 12 ਤੋਂ 14 ਪ੍ਰਤੀਸ਼ੱਤ ਹੈ ਤਾਂ 19 ਰੁਪਏ 25 ਪੈਸੇ ਅਤੇ ਜੇਕਰ ਮਾਜੂ ਦਾਣਾ 14 ਤੋਂ 16 ਪ੍ਰਤੀਸ਼ੱਤ ਹੈ 24 ਰੁਪਏ 26 ਪੈਸੇ ਪ੍ਰਤੀ ਕੁਇੰਟਲ ਦੇ ਰੇਟ ਘੱਟ ਮਿਲੇਗਾ, ਦੀ ਨਿਖੇਧੀ ਕਰਦੀ ਹੈ ਅਤੇ ਮੰਗ ਕਰਦੀ ਹੈ ਕਿ ਇਸ ਫੈਸਲੇ ਨੂੰ ਵਾਪਿਸ ਲਿਆ ਜਾਵੇ।
ਸੂਬਾ ਪ੍ਰਧਾਨ, ਡਾਕਟਰ ਦਰਸ਼ਨ ਪਾਲ, ਸੂਬਾ ਜਨਰਲ ਸਕੱਤਰ, ਗੁਰਮੀਤ ਸਿੰਘ ਮਹਿੰਮਾਂ ਫਿਰੋਜ਼ਪੁਰ, ਸੂਬਾ ਸੀਨੀਅਰ ਮੀਤ ਪ੍ਰਧਾਨ ਹਰਭਜਨ ਸਿੰਘ ਬੁੱਟਰ, ਫਤਿਗੜ੍ਹ ਸਾਹਿਬ ਦੇ ਜਿਲ੍ਹਾ ਪ੍ਰਧਾਨ ਹਰਨੇਕ ਸਿੰਘ ਭੱਲ੍ਹਮਾਜਰਾ, ਪਟਿਆਲਾ ਜਿਲ੍ਹੇ ਦੇ ਪ੍ਰਧਾਨ ਜੰਗ ਸਿੰਘ ਭਟੇੜ੍ਹੀ ਕਲਾਂ ਅਤੇ ਜਿਲ੍ਹਾ ਜਨਰਲ ਸਕੱਤਰ ਗੁਰਮੀਤ ਸਿੰਘ ਦਿੱਤੂਪੁਰ ਨੇ ਕਿਹਾ ਕਿ ਪਟਿਆਲਾ, ਫਤਿਹਗੜ੍ਹ ਸਾਹਿਬ ਅਤੇ ਹੋਰ ਜਿਥੇ ਜਿਥੇ ਵੀ ਮੌਸਮ ਖਰਾਬ ਰਿਹਾ ਹੈ ਉਥੇ ਉਥੇ ਹੀ ਕਿਸਾਨਾਂ ਨੂੰ ਵੱਧ ਹੈਰਾਨੀ ਅਤੇ ਪ੍ਰੇਸ਼ਾਨੀ ਦੇ ਨਾਲ ਨਾਲ ਲੁੱਟ ਦਾ ਨਵਾਂ ਰਾਹ ਲੱਭ ਲਿਆ ਹੈ।                                    ਆਗੂਆਂ ਨੇ ਚਿਤਾਵਨੀ ਦਿੱਤੀ ਕੇ ਜੇਕਰ ਫੈਸਲਾ ਵਾਪਸ ਨਾਂ ਲਿਆ ਗਿਆ ਤਾਂ ਕ੍ਰਾਂਤੀਕਾਰੀ ਕਿਸਾਨ ਯੂਨੀਅਨ ਮੰਡੀਆਂ ‘ਚ ਇੰਸਪੈਕਟਰਾਂ ਦਾ ਘੇਰਾਉ ਕਰਨ ਲਈ ਮਜਬੂਰ ਹੋਵੇਗੀ। ਆਗੂਆਂ ਨੇ ਮੰਗ ਕੀਤੀ ਕਿ ਝਾੜ੍ਹ ਘੱਟਣ ਅਤੇ ਖਰਚੇ ਵੱਧਣ ਦੇ ਇਵਜ਼ ‘ਚ 200 ਰੁਪਏ ਪ੍ਰਤੀ ਕੁਇੰਟਲ ਬੋਨਸ ਦਿੱਤਾ ਜਾਵੇ।