ਏ. ਟੀ. ਐੱਮ. ਕਾਰਡ ਨਾਲ ਪੈਸੇ ਕਢਾਉਣ ਨੂੰ ਲੈ ਕੇ ਨਵਾਂ ਨਿਯਮ ਲਾਗੂ ਕਰਨ ਜਾ ਰਿਹਾ ਹੈ SBI ਬੈਂਕ

ਨਵੀਂ ਦਿੱਲੀ : ਭਾਰਤੀ ਸਟੇਟ ਬੈਂਕ (ਐੱਸ. ਬੀ. ਆਈ.) ATM ਕਾਰਡ ਨਾਲ ਪੈਸੇ ਕਢਾਉਣ ਨੂੰ ਲੈ ਕੇ ਨਵਾਂ ਨਿਯਮ ਲਾਗੂ ਕਰਨ ਜਾ ਰਿਹਾ ਹੈ। ਬੈਂਕ ਦੇ ਕਲਾਸਿਕ ਅਤੇ ਮੈਸਟਰੋ ਕਾਰਡ ਦੀ ਰੋਜ਼ਾਨਾ ਪੈਸੇ ਕਢਾਉਣ ਦੀ ਲਿਮਟ 31 ਅਕਤੂਬਰ 2018 ਤੋਂ 20,000 ਰਹਿ ਜਾਵੇਗੀ। ਹੁਣ ਤਕ ਇਹ ਲਿਮਟ 40,000 ਰੁਪਏ ਸੀ। ਟ੍ਰਾਂਜੈਕਸ਼ਨ ‘ਚ ਹੋਣ ਵਾਲੀ ਧੋਖਾਧੜੀ ਦੀਆਂ ਸ਼ਿਕਾਇਤਾਂ ਦੇ ਬਾਅਦ ਬੈਂਕ ਵੱਲੋਂ ਇਹ ਲਿਮਟ ਲਾਉਣ ਦਾ ਫੈਸਲਾ ਕੀਤਾ ਗਿਆ ਹੈ।

Read Also ਹੁਣ ਬੈਂਕ ਦੀਆਂ ਇਨ੍ਹਾਂ ਸੇਵਾਵਾ ‘ਤੇ ਵੀ ਦੇਣਾ ਪਵੇਗਾ ਚਾਰਜ

ਹਾਲਾਂਕਿ ਇਸ ਨਾਲ ਵੱਡੀ ਮੁਸ਼ਕਲ ਖੜ੍ਹੀ ਹੋਣ ਦੀ ਸੰਭਾਵਨਾ ਨਹੀਂ ਹੈ ਪਰ ਇਹ ਹੈ ਕਿ ਕਿਸੇ ਦਿਨ ਜ਼ਿਆਦਾ ਨਕਦੀ ਦੀ ਜ਼ਰੂਰਤ ਨੂੰ ਦੇਖਦੇ ਹੋਏ ਤੁਹਾਨੂੰ ਪਹਿਲਾਂ ਹੀ ਪਲਾਨ ਬਣਾਉਣਾ ਹੋਵੇਗਾ। ਜਿਵੇਂ ਕਿ 7 ਨਵੰਬਰ ਨੂੰ ਦੀਵਾਲੀ ਹੈ, ਬਹੁਤ ਸਾਰੇ ਲੋਕ ਇਸ ਦਿਨ ਟੀ. ਵੀ., ਫਰਿੱਜ, ਬਾਈਕ ਆਦਿ ਖਰੀਦਦੇ ਹਨ। ਲਿਹਾਜਾ ਇਸ ਦਿਨ ਖਰੀਦਦਾਰੀ ਲਈ ਤੁਹਾਨੂੰ ਜ਼ਿਆਦਾ ਪੈਸੇ ਚਾਹੀਦੇ ਹੋਣਗੇ, ਯਾਨੀ ਕਿ ਤੁਹਾਨੂੰ ਪਹਿਲਾਂ ਲੋੜ ਮੁਤਾਬਕ ਪੈਸੇ ਕਢਾ ਕੇ ਰੱਖਣੇ ਪੈਣਗੇ। ਉੱਥੇ ਹੀ, ਮੰਨਿਆ ਜਾ ਰਿਹਾ ਹੈ ਐੱਸ. ਬੀ. ਆਈ. ਦਾ ਇਹ ਕਦਮ ਧੋਖਾਧੜੀ ‘ਤੇ ਰੋਕ ਲਾਉਣ ਦੇ ਨਾਲ-ਨਾਲ ਡਿਜੀਟਲ ਟ੍ਰਾਂਜੈਕਸ਼ਨ ਨੂੰ ਵੀ ਵਾਧਾ ਦੇ ਸਕਦਾ ਹੈ।

ਹਾਲਾਂਕਿ ਜੇਕਰ ਤੁਹਾਨੂੰ ਲੱਗਦਾ ਹੈ ਕਿ 20,000 ਦੀ ਲਿਮਟ ਬਹੁਤ ਘੱਟ ਹੈ, ਤਾਂ ਤੁਸੀਂ ਬੈਂਕ ‘ਚ ਜਾ ਕੇ ਹੋਰ ਡੈਬਿਟ ਕਾਰਡ ਲਈ ਅਪਲਾਈ ਕਰ ਸਕਦੇ ਹੋ, ਜਿਸ ਦੀ ਲਿਮਟ ਜ਼ਿਆਦਾ ਹੋਵੇ। ਭਾਰਤੀ ਸਟੇਟ ਬੈਂਕ ਨੇ ਇਕ ਨੋਟੀਫਿਕੇਸ਼ਨ ‘ਚ ਕਿਹਾ, ”ਕਲਾਸਿਕ ਅਤੇ ਮੈਸਟਰੋ ਡੈਬਿਟ ਕਾਰਡ ਦੀ ਕੈਸ਼ ਕਢਾਉਣ ਦੀ ਲਿਮਟ 40,000 ਰੁਪਏ ਰੋਜ਼ਾਨਾ ਤੋਂ ਘਟਾ ਕੇ 20 ਹਜ਼ਾਰ ਰੁਪਏ ਰੋਜ਼ਾਨਾ ਕਰ ਦਿੱਤੀ ਗਈ ਹੈ। ਜੇਕਰ ਤੁਹਾਨੂੰ ਰੋਜ਼ਾਨਾ ਜ਼ਿਆਦਾ ਪੈਸੇ ਕਢਾਉਣ ਦੀ ਲੋੜ ਹੈ, ਤਾਂ ਤੁਸੀਂ ਦੂਜੇ ਕਾਰਡ ਲਈ ਅਪਲਾਈ ਕਰ ਸਕਦੇ ਹੋ।”