ਉਡਾਣ ਭਰਨ ਤੋਂ ਪਹਿਲਾਂ ਜਹਾਜ਼ ‘ਚ ਲੱਗੀ ਅੱਗ

ਸਪੇਨ ਦੇ ਪਾਲਮਾ ਡੀ ਮਲਲੋਰਕਾ ਹਵਾਈ ਅੱਡੇ ‘ਤੇ ਉਸ ਸਮੇਂ ਹੰਗਾਮਾ ਮੱਚ ਗਿਆ, ਜਦੋਂ ਇੱਥੋਂ ਉਡਾਣ ਭਰਨ ਵਾਲੇ ਇੱਕ ਜਹਾਜ਼ ਨੂੰ ਅਚਾਨਕ ਅੱਗ ਲੱਗ ਗਈ। ਰਯਾਨਏਅਰ ਬੋਇੰਗ 737 ਜਹਾਜ਼ ਵਿੱਚ ਅੱਗ ਲੱਗ ਗਈ, ਜਿਸ ਨਾਲ ਹੜਕੰਪ ਮੱਚ ਗਿਆ। ਇਸ ਹਾਦਸੇ ਵਿੱਚ 18 ਲੋਕ ਜ਼ਖ਼ਮੀ ਹੋ ਗਏ ਹਨ।ਇਹ ਉਡਾਣ ਪਾਲਮਾ ਡੀ ਮਲਲੋਰਕਾ ਤੋਂ ਉਡਾਣ ਭਰ ਕੇ ਮੈਨਚੈਸਟਰ ਲੈਂਡ ਕਰਨ ਵਾਲੀ ਸੀ। ਅਰਬ ਟਾਈਮਜ਼ ਦੀ ਰਿਪੋਰਟ ਦੇ ਅਨੁਸਾਰ, ਐਮਰਜੈਂਸੀ ਵਿਭਾਗ ਨੂੰ ਤੁਰੰਤ ਇਸ ਬਾਰੇ ਸੂਚਿਤ ਕੀਤਾ ਗਿਆ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ ਗਏ। ਫਾਇਰਫਾਈਟਰਜ਼ ਅਤੇ ਸਿਵਲ ਗਾਰਡ ਦੇ ਮੈਂਬਰਾਂ ਨੇ ਯਾਤਰੀਆਂ ਨੂੰ ਜਹਾਜ਼ ਤੋਂ ਸੁਰੱਖਿਅਤ ਬਾਹਰ ਕੱਢਿਆ। ਮੌਕੇ ‘ਤੇ ਐਂਬੂਲੈਂਸਾਂ ਸੱਦੀਆਂ ਗਈਆਂ। ਹਾਦਸੇ ਤੋਂ ਬਾਅਦ, ਯਾਤਰੀਆਂ ਨੂੰ ਐਮਰਜੈਂਸੀ ਗੇਟ ਰਾਹੀਂ ਬਾਹਰ ਕੱਢਿਆ ਗਿਆ, ਜਿਸ ਵਿੱਚ ਕੁਝ ਯਾਤਰੀਆਂ ਨੇ ਬਚਾਅ ਲਈ ਸਿੱਧੇ ਜ਼ਮੀਨ ‘ਤੇ ਛਾਲ ਮਾਰ ਦਿੱਤੀ।ਇਸ ਘਟਨਾ ਦਾ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ, ਜਿਸ ਵਿੱਚ ਸਾਫ਼ ਦਿਖਾਈ ਦੇ ਰਿਹਾ ਹੈ ਕਿ ਡਰ ਦੇ ਮਾਰੇ ਯਾਤਰੀ ਫਲਾਈਟ ਤੋਂ ਸਿੱਧਾ ਜ਼ਮੀਨ ‘ਤੇ ਛਾਲ ਮਾਰ ਰਹੇ ਹਨ। ਯਾਤਰੀ ਅਲਾਰਮ ਵਿਚਾਲੇ ਜਹਾਜ਼ ਤੋਂ ਬਚਣ ਲਈ ਸੰਘਰਸ਼ ਕਰਦੇ ਨਜ਼ਰ ਆ ਰਹੇ ਹਨ।ਇਲਾਕੇ ਦੇ ਐਮਰਜੈਂਸੀ ਸੈਂਟਰ ਦੇ ਬੁਲਾਰੇ ਦੇ ਅਨੁਸਾਰ, ਇਸ ਘਟਨਾ ਵਿੱਚ ਕੁੱਲ 18 ਲੋਕ ਜ਼ਖਮੀ ਹੋਏ ਹਨ ਅਤੇ ਉਨ੍ਹਾਂ ਨੂੰ ਡਾਕਟਰੀ ਸਹਾਇਤਾ ਮਿਲ ਰਹੀ ਹੈ ਅਤੇ 6 ਯਾਤਰੀਆਂ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ। ਏਅਰਲਾਈਨ ਦਾ ਕਹਿਣਾ ਹੈ ਕਿ 4 ਜੁਲਾਈ ਨੂੰ ਪਾਲਮਾ ਤੋਂ ਮੈਨਚੈਸਟਰ ਜਾ ਰਹੇ ਜਹਾਜ਼ ਨੂੰ ਗਲਤ ਅੱਗ ਚੇਤਾਵਨੀ ਲਾਈਟ ਚਾਲੂ ਹੋਣ ਕਰਕੇ ਟੇਕ ਆਫ ਕਰਨ ਤੋਂ ਰੋਕਣਾ ਪਿਆ। ਏਅਰਲਾਈਨ ਨੇ ਕਿਹਾ, ‘ਯਾਤਰੀਆਂ ਨੂੰ ਇਨਫਲੇਟੇਬਲ ਸਲਾਈਡ ਦੀ ਮਦਦ ਨਾਲ ਉਤਾਰਿਆ ਗਿਆ ਅਤੇ ਟਰਮੀਨਲ ‘ਤੇ ਵਾਪਸ ਲਿਆਂਦਾ ਗਿਆ।’