ਸਵੇਰੇ ਸਪਾਈਸਜੈੱਟ ਤੇ ਸ਼ਾਮ ਨੂੰ ਏਅਰ ਇੰਡੀਆ ਦੇ ਜਹਾਜ਼ ਦੀ ਐਮਰਜੈਂਸੀ ਲੈਂਡਿੰਗ

ਸਪਾਈਸਜੈੱਟ ਦੇ ਜਹਾਜ਼ ਨੂੰ ਸਵੇਰੇ ਦਿੱਲੀ ਅਤੇ ਏਅਰ ਇੰਡੀਆ ਦੇ ਜਹਾਜ਼ ਨੂੰ ਮੰਗਲਵਾਰ ਸ਼ਾਮ ਨੂੰ ਐਮਰਜੈਂਸੀ ਲੈਂਡਿੰਗ ਕਰਨੀ ਪਈ। ਸਪਾਈਸਜੈੱਟ ਦੀ ਦਿੱਲੀ-ਸ਼੍ਰੀਨਗਰ ਉਡਾਣ ਦੇ ਪਾਇਲਟ ਨੂੰ ਜਹਾਜ਼ ਦੇ ਕਾਕਪਿਟ ਵਿੱਚ ਏਐਫਟੀ ਕਾਰਗੋ ਫਾਇਰ ਲਾਈਟ ਬਲਣ ਦੀ ਗਲਤ ਚੇਤਾਵਨੀ ਮਿਲੀ ਸੀ। ਇਸ ਤੋਂ ਬਾਅਦ ਜਹਾਜ਼ ਨੂੰ ਅੱਧ ਵਿਚਕਾਰ ਵਾਪਸ ਦਿੱਲੀ ਹਵਾਈ ਅੱਡੇ ‘ਤੇ ਉਤਾਰਿਆ ਗਿਆ। ਜਹਾਜ਼ ਵਿੱਚ 140 ਲੋਕ ਸਵਾਰ ਸਨ। ਸਾਰੇ ਯਾਤਰੀ ਸੁਰੱਖਿਅਤ ਹਨ। ਸ਼ਾਮ ਨੂੰ ਏਅਰ ਇੰਡੀਆ ਦੀ ਪੁਣੇ-ਦਿੱਲੀ ਫਲਾਈਟ ਨੂੰ ਦਿੱਲੀ ‘ਚ ਐਮਰਜੈਂਸੀ ਲੈਂਡਿੰਗ ਕਰਨੀ ਪਈ। ਪਾਇਲਟ ਨੇ ਜਹਾਜ਼ ਦੀ ਵਿੰਡਸ਼ੀਲਡ ਵਿੱਚ ਦਰਾੜ ਦੇਖੀ ਸੀ।ਏਅਰਲਾਈਨ ਦੇ ਬੁਲਾਰੇ ਅਨੁਸਾਰ ਸਪਾਈਸਜੈੱਟ ਬੀ737 ਨੇ ਦਿੱਲੀ-ਸ਼੍ਰੀਨਗਰ ਦੀ ਉਡਾਣ ਐਸਜੀ-8373 ਸਵੇਰੇ 9:45 ਵਜੇ ਦਿੱਲੀ ਤੋਂ ਸ੍ਰੀਨਗਰ ਲਈ ਉਡਾਣ ਭਰੀ ਸੀ। ਕਾਕਪਿਟ ਵਿੱਚ ਏਐਫਟੀ ਕਾਰਗੋ ਦੀ ਫਾਇਰ ਲਾਈਟ ਸ੍ਰੀਨਗਰ ਪਹੁੰਚਣ ਤੋਂ ਪਹਿਲਾਂ ਹੀ ਜਗ ਗਈ, ਜਿਸ ਤੋਂ ਬਾਅਦ ਇਸਨੂੰ ਤੁਰੰਤ ਦਿੱਲੀ ਲਿਆਉਣ ਦਾ ਫੈਸਲਾ ਕੀਤਾ ਗਿਆ। ਹਾਲਾਂਕਿ, ਜਦੋਂ ਪਾਇਲਟ ਨੇ ਇਸ ਦੀ ਜਾਂਚ ਕੀਤੀ, ਤਾਂ ਲਾਈਟ ਆਪਣੇ ਆਪ ਬੰਦ ਹੋ ਗਈ। ਲੈਂਡਿੰਗ ਤੋਂ ਪਹਿਲਾਂ ਸਾਰੇ ਸੰਚਾਲਨ ਮਾਪਦੰਡ ਆਮ ਪਾਏ ਗਏ ਅਤੇ ਸਾਰੇ ਯਾਤਰੀਆਂ ਨੂੰ ਸੁਰੱਖਿਅਤ ਰੂਪ ਨਾਲ ਫਲਾਈਟ ਤੋਂ ਉਤਾਰ ਲਿਆ ਗਿਆ। ਕੰਪਨੀ ਨੇ ਕਿਹਾ ਕਿ ਇਸ ਤੋਂ ਬਾਅਦ ਜਦੋਂ ਏਐੱਫਟੀ ਕਾਰਗੋ ਨੂੰ ਖੋਲ੍ਹਿਆ ਗਿਆ ਤਾਂ ਉੱਥੇ ਅੱਗ ਜਾਂ ਧੂੰਏ ਵਰਗਾ ਕੁਝ ਨਹੀਂ ਮਿਲਿਆ। ਸ਼ੁਰੂਆਤੀ ਜਾਂਚ ‘ਚ ਚੇਤਾਵਨੀ ਝੂਠੀ ਪਾਈ ਗਈ।ਸੂਤਰਾਂ ਮੁਤਾਬਕ ਜਦੋਂ ਪਾਇਲਟ ਨੇ ਕੰਟਰੋਲ ਰੂਮ ਨੂੰ ਸੂਚਨਾ ਦਿੱਤੀ ਤਾਂ ਸਵੇਰੇ 10:40 ਵਜੇ ਦਿੱਲੀ ਹਵਾਈ ਅੱਡੇ ‘ਤੇ ਪੂਰੀ ਐਮਰਜੈਂਸੀ ਘੋਸ਼ਿਤ ਕਰ ਦਿੱਤੀ ਗਈ। ਬਾਅਦ ਵਿੱਚ ਫਲਾਈਟ ਦੀ ਸੁਰੱਖਿਅਤ ਲੈਂਡਿੰਗ ਕਰਵਾਈ ਗਈ ਅਤੇ ਜਹਾਜ਼ ਨੂੰ ਪਾਰਕ ਕਰ ਦਿੱਤਾ ਗਿਆ।