ਲੇਬਨਾਨ ਵਿੱਚ ਲਗਾਤਾਰ ਦੂਜੇ ਦਿਨ ਕਈ ਧਮਾਕੇ, ਰੇਡੀਓ-ਲੈਪਟਾਪ ਤੇ ਮੋਬਾਈਲ ‘ਚ ਧਮਾਕੇ, 20 ਦੀ ਮੌਤ ਤੇ 450 ਤੋਂ ਵੱਧ ਜ਼ਖ਼ਮੀ

ਲੇਬਨਾਨ ਵਿੱਚ ਲਗਾਤਾਰ ਦੂਜੇ ਦਿਨ ਕਈ ਧਮਾਕੇ ਹੋਏ। ਮੰਗਲਵਾਰ ਨੂੰ ਪੇਜਰਾਂ ‘ਚ ਧਮਾਕੇ ਹੋਏ, ਜਦਕਿ ਅੱਜ ਸਾਰੇ ਇਲੈਕਟ੍ਰਾਨਿਕ ਯੰਤਰਾਂ ‘ਚ ਧਮਾਕੇ ਹੋਏ। ਇਸ ਵਿੱਚ ਲੈਪਟਾਪ, ਵਾਕੀ-ਟਾਕੀ ਅਤੇ ਮੋਬਾਈਲ ਵੀ ਸ਼ਾਮਲ ਹਨ। ਕਈ ਸ਼ਹਿਰਾਂ ਵਿੱਚ ਅਜਿਹੀਆਂ ਘਟਨਾਵਾਂ ਸਾਹਮਣੇ ਆ ਚੁੱਕੀਆਂ ਹਨ। 20 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ 450 ਤੋਂ ਵੱਧ ਲੋਕ ਜ਼ਖਮੀ ਹੋਏ ਹਨ। ਸਥਾਨਕ ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਇੱਕ ਘੰਟੇ ਦੇ ਅੰਦਰ ਬੇਰੂਤ, ਬੇਕਾ, ਨਬਾਤੀਹ ਅਤੇ ਦੱਖਣੀ ਲੇਬਨਾਨ ਵਿੱਚ ਸੈਂਕੜੇ ਲੋਕ ਜ਼ਖਮੀ ਹੋ ਗਏ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਘਰਾਂ ਵਿੱਚ ਮੋਬਾਈਲ ਫੋਨ ਦੇ ਨਾਲ-ਨਾਲ ਹੋਰ ਉਪਕਰਣ ਵੀ ਫਟ ਗਏ। ਕੁਝ ਇਮਾਰਤਾਂ ਵਿੱਚ ਅੱਗ ਲੱਗ ਗਈ। ਪੂਰੇ ਦੱਖਣੀ ਲੇਬਨਾਨ ਅਤੇ ਬੇਰੂਤ ਦੇ ਦੱਖਣੀ ਉਪਨਗਰਾਂ ਵਿੱਚ ਧਮਾਕਿਆਂ ਦੀ ਆਵਾਜ਼ ਸੁਣਾਈ ਦਿੱਤੀ।

ਇਸ ਤੋਂ ਇਲਾਵਾ ਘਰਾਂ ਵਿੱਚ ਵਰਤੇ ਜਾਣ ਵਾਲੇ ਇਲੈਕਟ੍ਰਾਨਿਕ ਘਰੇਲੂ ਉਪਕਰਨਾਂ ਵਿੱਚ ਵੀ ਧਮਾਕੇ ਹੋਣ ਦੀਆਂ ਖ਼ਬਰਾਂ ਹਨ। ਇੱਥੋਂ ਤੱਕ ਕਿ ਫਿੰਗਰ ਪ੍ਰਿੰਟ ਮਸ਼ੀਨਾਂ ਅਤੇ ਸੋਲਰ ਸਿਸਟਮ ਵਿੱਚ ਵੀ ਧਮਾਕੇ ਹੋ ਰਹੇ ਹਨ। ਇਸ ਨੂੰ ਦੇਖਦੇ ਹੋਏ ਕਿਹਾ ਜਾ ਸਕਦਾ ਹੈ ਕਿ ਲੇਬਨਾਨ ਵਿੱਚ ਇਲੈਕਟ੍ਰਾਨਿਕ ਗੈਜੇਟ ਸਟ੍ਰਾਈਕ ਹੋਈ ਹੈ।