ਦੁਸਹਿਰਾ ਮੌਕੇ ਲੁਧਿਆਣਾ ਤੇ ਮੰਡੀ ਗੋਬਿੰਦਗੜ੍ਹ ‘ਚ ਵਧਿਆ ਪ੍ਰਦੂਸ਼ਣ

ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਵਾਰ ਪਰਾਲ਼ੀ ਸਾੜਨ ਦੇ ਮਾਮਲੇ ਕਾਫ਼ੀ ਘਟ ਗਏ ਨੇ। ਪਰ ਪਿਛਲੇ ਦੋ ਦਿਨਾਂ ਤੋਂ ਮੰਡੀ ਗੋਬਿੰਦਗੜ੍ਹ ਤੇ ਲੁਧਿਆਣਾ ਜਿਹੇ ਉਦਯੋਗਿਕ ਸ਼ਹਿਰਾਂ ‘ਚ ਹਵਾ ਦਾ ਮਿਆਰ ਖ਼ਰਾਬ ਹੋਇਐ।

ਮਾਹਿਰਾਂ ਅਨੁਸਾਰ ਅਜਿਹਾ ਦੁਸਹਿਰਾ ਮੇਲੇ ਮੌਕੇ ਸਾੜੇ ਗਏ ਹਜ਼ਾਰਾਂ ਰਾਵਣਾਂ ਕਰਕੇ ਹੋਇਆ ਹੋ ਸਕਦੈ। ਇਸ ਦੇ ਬਾਵਜੂਦ ਪ੍ਰਦੁਸ਼ਣ ਪਿਛਲੇ ਸਾਲਾਂ ਨਾਲ਼ੋਂ ਘੱਟ ਐ।

ਦੋ ਅਕਤੂਬਰ ਨੂੰ ਦੁਸਹਿਰਾ ਵਾਲ਼ੇ ਦਿਨ ਮੰਡੀ ਗੋਬਿੰਦਗੜ੍ਹ ‘ਚ ਹਵਾ ਦਾ ਮਿਆਰ ‘ਏਕਿਊਆਈ’ ਭਾਵ ‘ਏਅਰ ਕੁਆਲਿਟੀ ਇੰਡੈਕਸ’ ਦੇ ਹਿਸਾਬ ਨਾਲ਼ 112 ਦਰਜ ਕੀਤਾ ਗਿਆ। ਪੰਜਾਬ ‘ਚ ਇਹ ਸਭ ਤੋਂ ਮਾੜੀ ਸਥਿਤੀ ਸੀ। ਪਿਛਲੇ ਵਰ੍ਹੇ ਇਹ 84 ਸੀ। ਪਿਛਲੇ ਸਾਲ ਲੁਧਿਆਣਾ ਦੀ ਹਵਾ ਦਾ ਮਿਆਰ ਦੁਸਹਿਰਾ ਦੇ ਤਿਉਹਾਰ ਵਾਲ਼ੇ ਦਿਨਾਂ ‘ਚ 102 ਸੀ ਤੇ ਐਤਕੀਂ ਇਹ 101 ਰਿਹਾ।

ਪਿਛਲੇ ਵਰ੍ਹੇ ਬਠਿੰਡਾ ਦਾ ਬਹੁਤ ਮਾੜਾ ਹਾਲ ਸੀ। ਤੇ ਇਸ ਨਗਰ ਦਾ ਏਕਿਊਆਈ 236 ਸੀ। ਇਸ ਵਾਰ ਇਹ 88 ਰਿਹਾ; ਜਿਸ ਨੂੰ ਜ਼ਮੀਨ ਤੇ ਅਸਮਾਨ ਜਿੰਨਾ ਫ਼ਰਕ ਮੰਨਿਆ ਜਾਵੇਗਾ।

ਇਸ ਵਾਰ ਅੰਮ੍ਰਿਤਸਰ ‘ਚ ਹਵਾ ਦਾ ਮਿਆਰ ਸੁਧਰਿਆ। ਇੱਥੇ ਏਕਿਊਆਈ 89 ਰਿਹਾ, ਜਦ ਕਿ ਪਿਛਲੇ ਸਾਲ ਇਹ 133 ਸੀ। ਜਲੰਧਰ ਦੇ ਹਾਲਾਤ ਵੀ ਇਸ ਵਾਰ ਠੀਕ ਰਹੇ। ਪਿਛਲੇ ਸਾਲ ਇਹ 84 ਸੀ ਤੇ ਇਸ ਵਾਰ 50 ਰਿਹਾ।

ਪਰਾਲ਼ੀ ਸਾੜਨ ਦੇ ਮਾਮਲਿਆਂ ‘ਚ ਇਸ ਵਾਰ ਕਾਫ਼ੀ ਰਾਹਤ ਵੇਖਣ ਨੂੰ ਮਿਲ਼ੀ ਐ। ਇਸ ਦਾ ਮਤਲਬ ਐ ਕਿ ਹੁਣ ਕਿਸਾਨਾਂ ‘ਚ ਜਾਗਰੂਕਤਾ ਵਧਦੀ ਜਾ ਰਹੀ ਐ। ਤਿੰਨ ਅਕਤੂਬਰ ਤੱਕ ਪੰਜਾਬ ‘ਚ ਕਿਤੇ ਵੀ ਪਰਾਲ਼ੀ ਨਹੀਂ ਸਾੜੀ ਗਈ ਸੀ। ਜਦ ਕਿ 29 ਸਤੰਬਰ ਨੂੰ ਪੰਜਾਬ ‘ਚ ਸਿਰਫ਼ 5 ਮਾਮਲੇ ਪਰਾਲ਼ੀ ਸਾੜਨ ਦੇ ਦਰਜ ਹੋਏ ਸਨ।

ਉਂਝ ਵੀ ਇਸ ਵਾਰ ਬਹੁਤ ਸਾਰਾ ਇਲਾਕਾ ਹੜ੍ਹਾਂ ਦੀ ਮਾਰ ਹੇਠ ਆ ਗਿਆ ਸੀ। ਜਿੱਥੇ ਝੋਨੇ ਦੀ ਫ਼ਸਲ ਬਰਬਾਦ ਹੋ ਚੁੱਕੀ ਐ। ਖ਼ਾਸ ਕਰਕੇ ਪਾਕਿਸਤਾਨ ਨਾਲ਼ ਲਗਦੇ ਸਰਹੱਦੀ ਇਲਾਕਿਆਂ ‘ਚ ਆਏ ਹੜ੍ਹਾਂ ਨੇ ਇਸ ਵਾਰ ਭਾਰੀ ਤਬਾਹੀ ਮਚਾਈ ਐ।

ਪੰਜਾਬ ਦੇ ਮਾਲਵਾ ਖ਼ਿੱਤੇ ਵਿੱਚ ਝੋਨੇ ਦੀ ਫ਼ਸਲ ਹਾਲ਼ੇ ਖੜ੍ਹੀ ਐ ਤੇ ਅਗਲੇ ਦਿਨਾਂ ‘ਚ ਫ਼ਸਲ ਪੱਕਣ ਤੋਂ ਬਾਅਦ ਵਾਢੀ ਹੋਵੇਗੀ। ਤਦ ਹੋ ਸਕਦੈ ਕਿ ਪਰਾਲ਼ੀ ਸਾੜਨ ਦੇ ਮਾਮਲਿਆਂ ‘ਚ ਕੁਝ ਵਾਧਾ ਹੋਵੇ।