D5 Channel PunjabiD5 specialDIASPORA DIALOUGEInternationalNews for PunjabPunjabreligion
ਅਮਰੀਕੀ ਫ਼ੌਜਾਂ ‘ਚ ਦਾੜ੍ਹੀ ਰੱਖਣ ‘ਤੇ ਲੱਗੀ ਪਾਬੰਦੀ
ਦੁਨੀਆ ਭਰ ਦੇ ਸਿੱਖਾਂ 'ਚ ਡਾਢਾ ਰੋਸ
ਭਾਰਤ ਸਰਕਾਰ ਤੇ ਐਸਜੀਪੀਸੀ ਦੇ ਪ੍ਰਤੀਕਰਮਾਂ ਦੀ ਉਡੀਕ
ਵਾਸ਼ਿੰਗਟਨ ਡੀਸੀ: ਅਮਰੀਕੀ ਰੱਖਿਆ ਮੰਤਰਾਲੇ ਨੇ ਦੇਸ਼ ਦੀਆਂ ਫ਼ੌਜਾਂ ‘ਚ ਦਾੜ੍ਹੀ ਰੱਖਣ ‘ਤੇ ਸਖ਼ਤੀ ਨਾਲ਼ ਪਾਬੰਦੀ ਲਾ ਦਿੱਤੀ ਐ। ਇਸ ਨਾਲ਼ ਖ਼ਾਸ ਤੌਰ ‘ਤੇ ਸਿੱਖਾਂ ‘ਚ ਡਾਢਾ ਰੋਸ ਐ। ਇਸ ਤੋਂ ਇਲਾਵਾ ਰਵਾਇਤੀ ਯਹੂਦੀ ਤੇ ਮੁਸਲਮਾਨਾਂ ਨੂੰ ਵੀ ਅਮਰੀਕੀ ਰੱਖਿਆ ਮੰਤਰਾਲੇ ਦੇ ਇਸ ਫ਼ੈਸਲੇ ‘ਤੇ ਡਾਢਾ ਇਤਰਾਜ਼ ਐ। ਕਿਉਂਕਿ ਉਹ ਵੀ ਆਪਣੇ ਧਰਮ ਮੁਤਾਬਕ ਦਾੜ੍ਹੀ ਰੱਖਦੇ ਨੇ।
ਅਮਰੀਕੀ ਸੰਗਠਨ ‘ਸਿੱਖ ਕੁਲੀਸ਼ਨ’ ਨੇ ਅਮਰੀਕੀ ਰੱਖਿਆ ਮੰਤਰੀ ਪੀਟ ਹੇਗਸੇਥ ਵੱਲੋਂ ਕੀਤੇ ਗਏ ਤਾਜ਼ਾ ਐਲਾਨ ਉਤੇ ਚਿੰਤਾ ਪ੍ਰਗਟਾਈ ਐ। ਇਸ ਫ਼ੈਸਲੇ ਉਤੇ ਭਾਰਤੀ ਮੰਤਰਾਲੇ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਕੀ ਪ੍ਰਤੀਕਰਮ ਹੋਵੇਗਾ, ਇਸ ਦੀ ਉਡੀਕ ਐ।
ਸਪੱਸ਼ਟ ਐ ਕਿ ਅਮਰੀਕੀ ਰੱਖਿਆ ਮੰਤਰਾਲੇ ਦੇ ਇਸ ਤਾਜ਼ਾ ਐਲਾਨ ਤੋਂ ਸਿੱਖ ਫ਼ੌਜੀ ਜਵਾਨਾਂ ਨੂੰ ਬੇਹੱਦ ਮੁਸ਼ਕਿਲ ਆਵੇਗੀ। ਕਿਉਂਕਿ ਮੰਤਰਾਲੇ ਨੇ ਸਪੱਸ਼ਟ ਕਰ ਦਿੱਤੈ ਕਿ ਹੁਣ ਦਾੜ੍ਹੀ ਰੱਖਣ ਦੀ ਛੋਟ ਕਿਸੇ ਨੂੰ ਨਹੀਂ ਮਿਲ਼ੇਗੀ। ਇਸ ਮਾਮਲੇ ‘ਚ ਸਭ ਨੂੰ ਅਨੁਸ਼ਾਸਨ ਰੱਖਣਾ ਹੋਵੇਗਾ। ਇੱਥੇ ਦੱਸ ਦੇਈਏ ਕਿ ਅਮਰੀਕੀ ਫ਼ੌਜਾਂ ‘ਚ ਵੀ ਬਹੁਤ ਸਾਰੇ ਸਾਬਤ–ਸੂਰਤ ਦਸਤਾਰਧਾਰੀ ਸਿੱਖ ਮੌਜੂਦ ਨੇ।
ਇਸ ਦੌਰਾਨ ਇੱਕ ਸਿੱਖ ਸਿਪਾਹੀ ਨੇ ਐਕਸ ‘ਤੇ ਆਪਣੇ ਜਜ਼ਬਾਤ ਪ੍ਰਗਟਾਉਂਦਿਆਂ ਕਿਹਾ ਕਿ – ‘ਮੇਰੇ ਕੇਸ ਮੇਰੀ ਪਛਾਣ ਨੇ। ਕਈ ਸਾਲਾਂ ਦੀ ਕਾਨੂੰਨੀ ਲੜਾਈ ਤੋਂ ਬਾਅਦ ਤਾਂ ਸਾਨੂੰ ਫ਼ੌਜਾਂ ਤੇ ਹੋਰ ਸਰਕਾਰੀ ਨੌਕਰੀਆਂ ‘ਤੇ ਕੇਸ ਰੱਖਣ ਦੀ ਇਜਾਜ਼ਤ ਲਈ ਸੀ। ਤੇ ਹੁਣ ਇਹ ਸਭ ਵਿਸ਼ਵਾਸਘਾਤ ਜਾਪਦੈ।’
ਅਮਰੀਕੀ ਰੱਖਿਆ ਮੰਤਰੀ ਪੀਟ ਹੇਗਸੇਥ ਨੇ ਦਾੜ੍ਹੀ ਨਾ ਰੱਖਣ ਸਬੰਧੀ ਐਲਾਨ ਬੀਤੇ ਦਿਨੀਂ ਸਮੁੰਦਰੀ ਫ਼ੌਜ ਦੇ ਕੁਆਂਟਿਕੋ ਸਥਿਤ ਕੋਰ ਬੇਸ ‘ਚ ਸੈਂਕੜੇ ਫ਼ੌਜੀ ਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਕੀਤਾ ਸੀ। ਉਨ੍ਹਾਂ ਕਿਹਾ ਸੀ ਕਿ ਸਾਰੇ ਜਵਾਨ ਇੱਕੋ ਜਿਹੇ ਦਿਸਣੇ ਚਾਹੀਦੇ ਨੇ। ਕਿਸੇ ‘ਚ ਕੋਈ ਵਖਰੇਵਾਂ ਵਿਖਾਈ ਨਹੀਂ ਦੇਣਾ ਚਾਹੀਦਾ।
ਮੰਤਰੀ ਦੇ ਉਸ ਭਾਸ਼ਣ ਦੇ ਕੁਝ ਘੰਟਿਆਂ ਬਾਅਦ ਹੀ ਰੱਖਿਆ ਮੰਤਰਾਲੇ ਨੇ ਇੱਕ ਮੀਮੋ ਵੀ ਜਾਰੀ ਕਰ ਦਿੱਤਾ ਗਿਆ ਸੀ। ਉਸ ‘ਚ ਫ਼ੌਜਾਂ ਦੀਆਂ ਸਾਰੀਆਂ ਸ਼ਾਖਾਵਾਂ ‘ਚ ਸਾਲ 2010 ਤੋਂ ਪਹਿਲਾਂ ਵਾਲ਼ੇ ਮਾਪਦੰਡ ਲਾਗੂ ਕਰਨ ਦੀ ਹਦਾਇਤ ਕੀਤੀ ਗਈ ਸੀ। ਨਾਲ਼ ਹੀ ਇਹ ਵੀ ਕਿਹਾ ਗਿਆ ਸੀ ਇਸ ਹੁਕਮ ਦੀ ਪਾਲਣਾ ਦੋ ਮਹੀਨਿਆਂ ਅੰਦਰ ਕੀਤੀ ਜਾਵੇ ਤੇ 90 ਦਿਨਾਂ ਅੰਦਰ ਇਹ ਹੁਕਮ ਪੂਰੀ ਤਰ੍ਹਾਂ ਸਾਰੀਆਂ ਫ਼ੌਜਾਂ ‘ਚ ਲਾਗੂ ਹੋ ਜਾਣ। ਹਰੇਕ ਫ਼ੌਜੀ ਜਵਾਨ ਤਾਇਨਾਤ ਕੀਤੇ ਜਾਣ ਤੋਂ ਪਹਿਲਾਂ ਪੂਰੀ ਤਰ੍ਹਾਂ ‘ਕਲੀਨ ਸ਼ੇਵ’ ਹੋਵੇ।
ਇੱਥੇ ਇਹ ਵੀ ਦੱਸਣਾ ਬਣਦੈ ਕਿ ਪੀਟ ਹੇਗਸੇਥ ਪਹਿਲਾਂ ਆਰਮੀ ਨੈਸ਼ਨਲ ਗਾਰਡ ਅਧਿਕਾਰੀ ਰਹਿ ਚੁੱਕੇ ਨੇ। ਉਨ੍ਹਾਂ ਦੀ ਮੰਤਰੀ ਵਜੋਂ ਨਿਯੁਕਤੀ ਵੇਲੇ ਵੀ ਕਈ ਇਤਰਾਜ਼ ਉਠੇ ਸਨ। ਕਿਉਂਕਿ ਉਹ ਪਹਿਲਾਂ ਕਈ ਵਿਵਾਦਗ੍ਰਸਤ ਲਿਖਤਾਂ ਲਿਖ ਚੁੱਕੇ ਨੇ ਤੇ ਉਨ੍ਹਾਂ ਦਾ ਵਿਵਹਾਰ ਵੀ ਕਈ ਤਰ੍ਹਾਂ ਦੇ ਵਿਵਾਦਾਂ ‘ਚ ਘਿਰਿਆ ਰਿਹੈ। ਉਹ ਪਹਿਲਾਂ ਦਾੜ੍ਹੀ ਵਾਲ਼ਿਆਂ ਤੇ ਮੋਟੇ ਫ਼ੌਜੀ ਜਰਨੈਲਾਂ ਦਾ ਮਜ਼ਾਕ ਵੀ ਉਠਾ ਚੁੱਕੇ ਨੇ।
Post Disclaimer
Opinion/facts in this article are author\'s own and punjabi.newsd5.in does not assume any responsibility or liability for the same.If You Have Problem With This Article Plz Contact Our Team At Contact Us Page.
