ਕੈਨੇਡਾ ਵੱਲੋਂ ਯੋਗ ਫ਼ਲਸਤੀਨੀ ਨਾਗਰਿਕਾਂ ਲਈ ਫੀਸ-ਮੁਕਤ ਵਰਕ ਅਤੇ ਸਟੱਡੀ ਪਰਮਿਟ ਦੀ ਸਹੂਲਤ

ਕੈਨੇਡਾ ਨੇ ਯੋਗ ਫ਼ਲਸਤੀਨੀ ਨਾਗਰਿਕਾਂ ਅਤੇ ਕੈਨੇਡੀਅਨ ਨਾਗਰਿਕਾਂ ਜਾਂ ਸਥਾਈ ਨਿਵਾਸੀਆਂ ਦੇ ਕੁਝ ਪਰਿਵਾਰਕ ਮੈਂਬਰਾਂ ਲਈ ਨਵੀਂ ਅਸਥਾਈ ਇਮੀਗ੍ਰੇਸ਼ਨ ਨੀਤੀ ਲਾਗੂ ਕੀਤੀ ਹੈ।ਇਸ ਨੀਤੀ ਤਹਿਤ ਯੋਗ ਵਿਅਕਤੀ ਕੈਨੇਡਾ ਦੇ ਅੰਦਰੋਂ ਓਪਨ ਵਰਕ ਪਰਮਿਟ, ਸਟੱਡੀ ਪਰਮਿਟ, ਟੈਂਪਰੇਰੀ ਰੈਜ਼ੀਡੈਂਟ ਪਰਮਿਟ ਜਾਂ ਆਪਣੇ ਅਸਥਾਈ ਦਰਜੇ ਦੀ ਮਿਆਦ ਵਧਾਉਣ ਲਈ ਅਰਜ਼ੀ ਦੇ ਸਕਦੇ ਹਨ। ਯੋਗ ਅਰਜ਼ੀਆਂ ’ਤੇ ਲੱਗਣ ਵਾਲੀਆਂ ਕੁਝ ਪ੍ਰੋਸੈਸਿੰਗ ਫੀਸਾਂ ਵੀ ਮੁਆਫ਼ ਕੀਤੀਆਂ ਜਾ ਸਕਦੀਆਂ ਹਨ।ਇਹ ਸਹੂਲਤ ਉਨ੍ਹਾਂ ਯੋਗ ਲੋਕਾਂ ਲਈ ਹੈ, ਜੋ ਕੈਨੇਡਾ ਵਿੱਚ ਵੈਧ ਅਸਥਾਈ ਦਰਜੇ ਨਾਲ ਰਹਿ ਰਹੇ ਹਨ ਅਤੇ ਜਿਨ੍ਹਾਂ ਦੀ ਅਧਿਕਾਰਤ ਰਹਿਣ ਦੀ ਮਿਆਦ 30 ਸਤੰਬਰ 2027 ਜਾਂ ਇਸ ਤੋਂ ਪਹਿਲਾਂ ਸ਼ੁਰੂ ਹੋਈ ਹੋਵੇ।ਇਸ ਵਿੱਚ ਫ਼ਲਸਤੀਨੀ ਅਥਾਰਟੀ ਵੱਲੋਂ ਜਾਰੀ ਪਾਸਪੋਰਟ ਜਾਂ ਯਾਤਰਾ ਦਸਤਾਵੇਜ਼ ਰੱਖਣ ਵਾਲੇ ਨਾਗਰਿਕਾਂ ਤੋਂ ਇਲਾਵਾ ਉਹ ਯੋਗ ਪਰਿਵਾਰਕ ਮੈਂਬਰ ਵੀ ਸ਼ਾਮਲ ਹੋ ਸਕਦੇ ਹਨ, ਜਿਨ੍ਹਾਂ ਨੇ 7 ਅਕਤੂਬਰ 2023 ਜਾਂ ਉਸ ਤੋਂ ਬਾਅਦ ਫ਼ਲਸਤੀਨ ਛੱਡਿਆ ਹੋਵੇ।ਬਿਨੈਕਾਰਾਂ ਨੂੰ ਉਹ ਸਾਰੀਆਂ ਯੋਗਤਾ ਅਤੇ ਦਾਖ਼ਲਾ ਸ਼ਰਤਾਂ ਪੂਰੀਆਂ ਕਰਨੀਆਂ ਪੈਣਗੀਆਂ, ਜਿਨ੍ਹਾਂ ਤੋਂ ਇਸ ਨੀਤੀ ਅਧੀਨ ਵਿਸ਼ੇਸ਼ ਤੌਰ ’ਤੇ ਛੋਟ ਨਹੀਂ ਦਿੱਤੀ ਗਈ।ਇਹ ਨੀਤੀ 1 ਅਗਸਤ 2026 ਤੋਂ ਲਾਗੂ ਹੋਈ ਅਤੇ 30 ਦਸੰਬਰ 2027 ਤੱਕ ਚੱਲਣੀ ਹੈ। ਹਾਲਾਂਕਿ ਸਰਕਾਰ ਇਸ ਨੂੰ ਪਹਿਲਾਂ ਵੀ ਰੱਦ ਕਰ ਸਕਦੀ ਹੈ।