ਕਰਜ਼ਾ ਨਾ ਮੋੜਨ ਕਰਕੇ ਨੀਲਾਮ ਹੋਣਗੇ London ਦੇ ₹450 ਕਰੋੜ ਵਾਲੇ luxurious penthouse

ਲੰਡਨ ਦੇ ਸਭ ਤੋਂ ਮਹਿੰਗੇ ਅਤੇ ਵੀਆਈਪੀ ਖੇਤਰਾਂ ਵਿੱਚੋਂ ਇੱਕ ਕੇਨਸਿੰਗਟਨ ਵਿੱਚ ਸਥਿਤ ਦੋ ਸੁਪਰ-ਲਗਜ਼ਰੀ ਪੈਂਟਹਾਊਸ ਕਰਜ਼ੇ ਦੀ ਅਦਾਇਗੀ ਨਾ ਕਰਨ ਕਰਕੇ ਜਲਦ ਹੀ ਨੀਲਾਮ ਕੀਤੇ ਜਾਣਗੇ। ਲਗਭਗ 36 ਮਿਲੀਅਨ ਪੌਂਡ (ਲਗਭਗ 450 ਕਰੋੜ ਰੁਪਏ) ਦੀ ਕੀਮਤ ਵਾਲੀਆਂ ਇਹਨਾਂ ਜਾਇਦਾਦਾਂ ਨੂੰ ਖਰੀਦਣ ਲਈ ਲਏ ਗਏ ਮੌਰਗੇਜ ਕਰਜ਼ੇ ਸਮੇਂ ਸਿਰ ਨਾ ਮੋੜੇ ਜਾਣ ਕਰਕੇ ਕਰਜ਼ਾਦਾਤਾਵਾਂ ਨੇ ਪੈਸੇ ਦੀ ਵਸੂਲੀ ਲਈ ਇਹਨਾਂ ਨੂੰ ਬਾਜ਼ਾਰ ਵਿੱਚ ਵੇਚਣ ਦੀ ਕਾਨੂੰਨੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ।ਕਾਗਜ਼ਾਂ ‘ਤੇ ਇਹਨਾਂ ਜਾਇਦਾਦਾਂ ਦੀ ਮਾਲਕੀ ਈਰਾਨੀ ਬੈਂਕਰ ਅਲੀ ਅੰਸਾਰੀ ਦੇ ਨਾਮ ‘ਤੇ ਰਜਿਸਟਰਡ ਹੈ, ਪਰ ਮਹੱਤਵਪੂਰਨ ਗੱਲ ਇਹ ਹੈ ਕਿ ਇਸ ਮਾਲਕੀ ਨੂੰ ਈਰਾਨ ਦੇ ਸੁਪਰੀਮ ਲੀਡਰ ਮੋਜਤਬਾ ਖਮੇਨੀ ਦੇ ਨੈੱਟਵਰਕ ਨਾਲ ਜੋੜ ਕੇ ਦੇਖਿਆ ਜਾ ਰਿਹਾ ਹੈ।ਇਹਨਾਂ ਵਿੱਚੋਂ ਪਹਿਲਾ ਪੈਂਟਹਾਊਸ ਇਮਾਰਤ ਦੀ ਛੇਵੀਂ ਅਤੇ ਸੱਤਵੀਂ ਮੰਜ਼ਿਲ ‘ਤੇ ਸਥਿਤ ਲਗਭਗ 3,944 ਵਰਗ ਫੁੱਟ ਦਾ ਇੱਕ ਵੱਡਾ ਡੁਪਲੈਕਸ ਹੈ, ਜਿਸ ਵਿੱਚ ਪੰਜ ਬੈੱਡਰੂਮ, ਸਟਾਫ ਕੁਆਰਟਰ ਅਤੇ ਇੱਕ ਸ਼ਾਨਦਾਰ ਨਿੱਜੀ ਛੱਤ ਸ਼ਾਮਲ ਹੈ। ਅੰਸਾਰੀ ਨੇ ਇਸ ਨੂੰ ਸਾਲ 2016 ਵਿੱਚ ਲਗਭਗ 19 ਮਿਲੀਅਨ ਪੌਂਡ ਵਿੱਚ ਖਰੀਦਿਆ ਸੀ, ਪਰ ਹੁਣ ਇਹ ਘਟਾਈ ਗਈ ਕੀਮਤ ਲਗਭਗ 12 ਮਿਲੀਅਨ ਪੌਂਡ (ਲਗਭਗ 140 ਕਰੋੜ ਰੁਪਏ) ਵਿੱਚ ਵਿਕਰੀ ਲਈ ਉਪਲਬਧ ਹੈ। ਇਸੇ ਇਮਾਰਤ ਦੀ ਸੱਤਵੀਂ ਅਤੇ ਅੱਠਵੀਂ ਮੰਜ਼ਿਲ ‘ਤੇ ਸਥਿਤ ਦੂਜਾ ਪੈਂਟਹਾਊਸ 2014 ਵਿੱਚ 16.75 ਮਿਲੀਅਨ ਪੌਂਡ ਵਿੱਚ ਖਰੀਦਿਆ ਗਿਆ ਸੀ, ਜੋ ਹੁਣ ਨਿਲਾਮੀ ਦੀ ਪ੍ਰਕਿਰਿਆ ਅਧੀਨ ਹੈ।ਇਹ ਜਾਇਦਾਦਾਂ ਆਪਣੀ ਭਾਰੀ ਕੀਮਤ ਤੋਂ ਇਲਾਵਾ ਆਪਣੀ ਸੰਵੇਦਨਸ਼ੀਲ ਭੂਗੋਲਿਕ ਸਥਿਤੀ ਕਰਕੇ ਵੀ ਚਰਚਾ ਦਾ ਕੇਂਦਰ ਬਣੀਆਂ ਹੋਈਆਂ ਹਨ। ਕੇਨਸਿੰਗਟਨ ਪੈਲੇਸ ਦੇ ਨੇੜੇ ਸਥਿਤ ਇਹ ਪੈਂਟਹਾਊਸ ਲੰਡਨ ਵਿੱਚ ਇਜ਼ਰਾਈਲੀ ਦੂਤਾਵਾਸ ਤੋਂ 50 ਮੀਟਰ ਤੋਂ ਵੀ ਘੱਟ ਦੂਰੀ ‘ਤੇ ਹਨ। ਮਾਹਰਾਂ ਅਨੁਸਾਰ ਇਹਨਾਂ ਫਲੈਟਾਂ ਦੀਆਂ ਬਾਲਕੋਨੀਆਂ ਅਤੇ ਛੱਤਾਂ ਤੋਂ ਇਜ਼ਰਾਈਲੀ ਦੂਤਾਵਾਸ ਦੇ ਪਿਛਲੇ ਹਿੱਸੇ ਦਾ ਸਿੱਧਾ ਦ੍ਰਿਸ਼ ਦਿਖਾਈ ਦਿੰਦਾ ਹੈ, ਜਿਸ ਕਾਰਨ ਸੁਰੱਖਿਆ ਏਜੰਸੀਆਂ ਲੰਬੇ ਸਮੇਂ ਤੋਂ ਇਸ ਸੰਵੇਦਨਸ਼ੀਲ ਸਥਿਤੀ ‘ਤੇ ਗੰਭੀਰ ਸਵਾਲ ਚੁੱਕ ਰਹੀਆਂ ਸਨ। ਹੁਣ ਮੌਰਗੇਜ ਡਿਫਾਲਟ ਹੋਣ ਤੋਂ ਬਾਅਦ ਇਹ ਵਿਵਾਦਪੂਰਨ ਜਾਇਦਾਦਾਂ ਨਵੇਂ ਖਰੀਦਦਾਰਾਂ ਦੀ ਭਾਲ ਵਿੱਚ ਹਨ।