ਮਾਂ ਨੇ 11 ਮਹੀਨੇ ਦੇ ਬੇਟੇ ਨੂੰ ਮਾਰੀ ਗੋਲੀ

ਨਿਊ ਮੈਕਸੀਕੋ ਦੇ ਸਿਲਵਰ ਸਿਟੀ ਤੋਂ ਇੱਕ ਦਿਲ ਦਹਿਲਾ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਕਸਟਡੀ ਦੀ ਲੜਾਈ ਵਿੱਚ ਇੱਕ ਮਾਂ ਨੇ ਬੇਰਹਿਮੀ ਦੀਆਂ ਸਾਰੀਆਂ ਹੱਦਾਂ ਪਾਰ ਕਰ ਦਿੱਤੀਆਂ ਹਨ।36 ਸਾਲਾ ਮੇਡੇਲੀਨ ਵੇਰੋਨਿਕ ਡੇਲੀ ਨੂੰ ਆਪਣੇ ਹੀ 11 ਮਹੀਨੇ ਦੇ ਪੁੱਤਰ ਬੇਸਿਲ ਸਟੋਨਰ ਦਾ ਅਗਵਾ ਕਰਨ ਅਤੇ ਚਿਹਰੇ ਉੱਤੇ ਗੋਲੀ ਮਾਰ ਕੇ ਉਸ ਦੀ ਹੱਤਿਆ ਕਰਨ ਦਾ ਦੋਸ਼ੀ ਠਹਿਰਾਇਆ ਗਿਆ ਹੈ। ਔਰਤ ਨੇ ਇਸ ਖ਼ੌਫ਼ਨਾਕ ਵਾਰਦਾਤ ਨੂੰ ਸਿਰਫ਼ ਇਸ ਲਈ ਅੰਜਾਮ ਦਿੱਤਾ ਤਾਂ ਜੋ ਬੱਚੇ ਦੇ ਪਿਤਾ ਨੂੰ ਉਸ ਦੀ ਕਸਟਡੀ ਨਾ ਮਿਲ ਸਕੇ।
ਸਰਕਾਰੀ ਵਕੀਲਾਂ ਅਨੁਸਾਰ, ਮੇਡੇਲੀਨ ਨੇ ਕੋਰਟ ਦੇ ਆਦੇਸ਼ ਦੀ ਉਲੰਘਣਾ ਕਰਦੇ ਹੋਏ ਬੱਚੇ ਨੂੰ ਅਗਵਾ ਕੀਤਾ ਅਤੇ ਉਸ ਨੂੰ ਰਾਜ ਦੀਆਂ ਸਰਹੱਦਾਂ ਦੇ ਪਾਰ ਵਾਇਓਮਿੰਗ ਤੋਂ ਨਿਊ ਮੈਕਸੀਕੋ ਲੈ ਗਈ।
ਅਦਾਲਤ ਨੇ ਬੱਚੇ ਦੇ ਪਿਤਾ ਨੂੰ ਉਸ ਦੀ ਐਮਰਜੈਂਸੀ ਕਸਟਡੀ ਦਿੱਤੀ ਸੀ। ਪਿਤਾ ਨੇ ਜਾਂਚਕਰਤਾਵਾਂ ਨੂੰ ਦੱਸਿਆ ਕਿ ਉਸ ਨੇ ਆਖਰੀ ਵਾਰ ਆਪਣੇ ਪੁੱਤਰ ਨੂੰ 28 ਸਤੰਬਰ ਨੂੰ ਦੇਖਿਆ ਸੀ।ਗ੍ਰਾਂਟ ਕਾਉਂਟੀ ਸ਼ੈਰਿਫ ਦਫ਼ਤਰ ਨੇ 23 ਦਸੰਬਰ ਨੂੰ ਮੇਡੇਲੀਨ ਨੂੰ ਸਿਲਵਰ ਸਿਟੀ ਨੇੜੇ ਇੱਕ ਆਰ.ਵੀ. ਪਾਰਕ ਵਿੱਚ ਲੱਭ ਲਿਆ। ਦਰਅਸਲ, ਉਸ ਨੇ ਉੱਥੇ ਇੱਕ ਨੌਕਰੀ ਲਈ ਅਰਜ਼ੀ ਦਿੱਤੀ ਸੀ ਅਤੇ ਬੈਕਗ੍ਰਾਊਂਡ ਚੈੱਕ ਦੌਰਾਨ ਉਸ ਦੇ ਖ਼ਿਲਾਫ਼ ਜਾਰੀ ਗ੍ਰਿਫ਼ਤਾਰੀ ਵਾਰੰਟ ਸਾਹਮਣੇ ਆ ਗਿਆ।ਪੁਲਿਸ ਨੂੰ ਦੇਖ ਕੇ ਉਹ ਆਰ.ਵੀ. ਦੇ ਅੰਦਰ ਭੱਜ ਗਈ। ਜਦੋਂ ਪੁਲਿਸ ਅੰਦਰ ਜਾਣ ਲਈ ਵਾਰੰਟ ਦਾ ਇੰਤਜ਼ਾਰ ਕਰਦੇ ਹੋਏ ਆਰ.ਵੀ. ਨੂੰ ਘੇਰੀ ਖੜ੍ਹੀ ਸੀ, ਤਾਂ ਉਨ੍ਹਾਂ ਨੂੰ ਇੱਕ ਗੋਲੀ ਚੱਲਣ ਦੀ ਆਵਾਜ਼ ਸੁਣਾਈ ਦਿੱਤੀ।
ਪੁਲਿਸ ਤੁਰੰਤ ਅੰਦਰ ਦਾਖ਼ਲ ਹੋਈ ਅਤੇ ਦੇਖਿਆ ਕਿ ਮੇਡੇਲੀਨ ਨੇ 9 ਐੱਮ.ਐੱਮ. ਹੈਂਡਗਨ ਨਾਲ ਬੇਸਿਲ ਦੇ ਚਿਹਰੇ ਉੱਤੇ ਗੋਲੀ ਮਾਰ ਕੇ ਉਸ ਦੀ ਹੱਤਿਆ ਕਰ ਦਿੱਤੀ ਹੈ। ਇਸ ਤੋਂ ਬਾਅਦ ਉਸ ਨੇ ਖ਼ੁਦ ਨੂੰ ਵੀ ਗੋਲੀ ਮਾਰਨ ਦੀ ਕੋਸ਼ਿਸ਼ ਕੀਤੀ ਪਰ ਪੁਲਿਸ ਅਧਿਕਾਰੀਆਂ ਨੇ ਉਸ ਨੂੰ ਤੁਰੰਤ ਕਾਬੂ ਕਰ ਲਿਆ।
ਗ੍ਰਿਫ਼ਤਾਰੀ ਤੋਂ ਬਾਅਦ, ਮੇਡੇਲੀਨ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸ ਦਾ ਮੰਨਣਾ ਸੀ ਕਿ ਅਜਿਹਾ ਕਰਕੇ ਉਹ ਆਪਣੇ ਬੱਚੇ ਨੂੰ ਸੁਰੱਖਿਅਤ ਕਰ ਰਹੀ ਹੈ। ਹਲਫ਼ਨਾਮੇ ਅਨੁਸਾਰ, ਉਸ ਨੇ ਕਿਹਾ ਕਿ ਪਿਤਾ ਅਤੇ ਉਸ ਦੇ ਰਿਸ਼ਤੇਦਾਰਾਂ ਨੂੰ ਬੱਚੇ ਤੋਂ ਦੂਰ ਰੱਖਣ ਲਈ ਬੱਚੇ ਦੀ ਜਾਨ ਲੈਣਾ ਉਸ ਨੂੰ ਉਚਿਤ ਲੱਗਿਆ।ਉਸ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ ਆਪਣੇ ਬੱਚੇ ਨੂੰ ਮਹੀਨੇ ਵਿੱਚ ਦੋ ਵਾਰ ਨੇਬ੍ਰਾਸਕਾ ਅਤੇ ਵਾਇਓਮਿੰਗ ਦੇ ਵਿਚਕਾਰ ਇੱਧਰ-ਉੱਧਰ ਭਟਕਣ ਨਹੀਂ ਦੇ ਸਕਦੀ ਸੀ। ਜਦੋਂ ਉਸ ਤੋਂ ਪੁੱਛਿਆ ਗਿਆ ਕਿ ਪੁਲਿਸ ਨੂੰ ਆਪਣੀ ਤਰਫ਼ ਆਉਂਦੇ ਦੇਖ ਉਸ ਦੇ ਦਿਮਾਗ ਵਿੱਚ ਕੀ ਚੱਲ ਰਿਹਾ ਸੀ, ਤਾਂ ਉਸ ਨੇ ਜਵਾਬ ਦਿੱਤਾ, ਬੱਚੇ ਦਾ ਪਿਤਾ ਜੇਕ ਬੇਸਿਲ ਨੂੰ ਨਹੀਂ ਲੈ ਜਾ ਸਕਦਾ।ਉਸ ਨੇ ਬਿਨਾਂ ਕਿਸੇ ਸਬੂਤ ਦੇ ਇਹ ਵੀ ਦਾਅਵਾ ਕੀਤਾ ਕਿ ਪਿਤਾ ਕੋਲ ਜਾਣ ਉੱਤੇ ਬੱਚੇ ਨੂੰ ਖ਼ਤਰਾ ਹੋ ਸਕਦਾ ਸੀ ਅਤੇ ਉਸ ਨਾਲ ਸਰੀਰਕ ਸ਼ੋਸ਼ਣ ਦੀ ਸੰਭਾਵਨਾ ਸੀ।
ਬੁੱਧਵਾਰ ਨੂੰ ਅਦਾਲਤ ਵਿੱਚ ਸੁਣਵਾਈ ਦੌਰਾਨ ਮੈਡੇਲੀਨ ਡੇਲੀ ਨੇ ਪਹਿਲੀ ਡਿਗਰੀ ਕਤਲ ਦਾ ਦੋਸ਼ੀ ਮੰਨਿਆ। ਸਰਕਾਰੀ ਵਕੀਲਾਂ ਦਾ ਕਹਿਣਾ ਹੈ ਕਿ ਇਸ ਘਿਨਾਉਣੇ ਅਪਰਾਧ ਲਈ ਉਸਨੂੰ ਵੱਧ ਤੋਂ ਵੱਧ ਉਮਰ ਕੈਦ ਦੀ ਸਜ਼ਾ ਹੋ ਸਕਦੀ ਹੈ।