ਅਮਰੀਕਾ ‘ਚ ਵੀਜ਼ਾ ਧੋਖਾਧੜੀ: 11 ਭਾਰਤੀਆਂ ‘ਤੇ ਲੱਗੇ ਗੰਭੀਰ ਦੋਸ਼, ਗ੍ਰੀਨ ਕਾਰਡ ਲਈ ਰਚਦੇ ਸਨ ‘ਲੁੱਟ-ਖੋਹ’ ਦੀਆਂ ਝੂਠੀਆਂ ਸਾਜ਼ਿਸ਼ਾਂ

ਅਮਰੀਕਾ ਵਿੱਚ ਗੈਰ-ਕਾਨੂੰਨੀ ਤਰੀਕੇ ਨਾਲ ਰਹਿ ਰਹੇ 11 ਭਾਰਤੀਆਂ ‘ਤੇ ਵੀਜ਼ਾ ਧੋਖਾਧੜੀ ਦਾ ਵੱਡਾ ਇਲਜ਼ਾਮ ਲੱਗਾ ਹੈ। ਇਨ੍ਹਾਂ ਲੋਕਾਂ ‘ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਵੀਜ਼ਾ ਹਾਸਲ ਕਰਨ ਲਈ ਸਟੋਰਾਂ ਵਿੱਚ ਨਕਲੀ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਦੀ ਸਾਜ਼ਿਸ਼ ਰਚੀ ਤਾਂ ਜੋ ਸਟੋਰ ਦੇ ਮੁਲਾਜ਼ਮ ਖ਼ੁਦ ਨੂੰ ‘ਅਪਰਾਧ ਦੇ ਪੀੜਤ’ ਦਿਖਾ ਕੇ ਗ੍ਰੀਨ ਕਾਰਡ ਲਈ ਅਪਲਾਈ ਕਰ ਸਕਣ।ਇਸ ਮਾਮਲੇ ਵਿੱਚ ਜਿਨ੍ਹਾਂ 11 ਭਾਰਤੀਆਂ ਨੂੰ ਨਾਮਜ਼ਦ ਕੀਤਾ ਗਿਆ ਹੈ, ਉਨ੍ਹਾਂ ਵਿੱਚ ਜਿਤੇਂਦਰਕੁਮਾਰ ਪਟੇਲ, ਮਹੇਸ਼ਕੁਮਾਰ ਪਟੇਲ, ਸੰਜੇਕੁਮਾਰ ਪਟੇਲ, ਦੀਪਿਕਾਬੇਨ ਪਟੇਲ, ਰਮੇਸ਼ਭਾਈ ਪਟੇਲ, ਅਮਿਤਾਬੇਨ ਪਟੇਲ, ਰੋਨਕਕੁਮਾਰ ਪਟੇਲ, ਸੰਗੀਤਾਬੇਨ ਪਟੇਲ, ਮਿਨਕੇਸ਼ ਪਟੇਲ, ਸੋਨਲ ਪਟੇਲ ਅਤੇ ਮਿਤੁਲ ਪਟੇਲ। ਇਹ ਸਾਰੇ ਮੈਸਾਚੂਸਟਸ, ਕੈਂਟਕੀ ਅਤੇ ਓਹੀਓ ਵਰਗੇ ਵੱਖ-ਵੱਖ ਰਾਜਾਂ ਵਿੱਚ ਰਹਿ ਰਹੇ ਸ਼ਾਮਲ ਹਨ।ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਇਹ ਲੋਕ ਯੋਜਨਾਬੱਧ ਤਰੀਕੇ ਨਾਲ ਸਟੋਰਾਂ ਵਿੱਚ ਲੁੱਟ-ਖੋਹ ਦਾ ਨਾਟਕ ਕਰਦੇ ਸਨ। ਇਸ ਦਾ ਮੁੱਖ ਮਕਸਦ ਉੱਥੇ ਮੌਜੂਦ ਮੁਲਾਜ਼ਮਾਂ ਨੂੰ ‘U ਵੀਜ਼ਾ’ (U-Visa) ਲਈ ਯੋਗ ਬਣਾਉਣਾ ਸੀ। ਮੁਲਾਜ਼ਮ ਇਹ ਝੂਠਾ ਦਾਅਵਾ ਕਰਦੇ ਸਨ ਕਿ ਉਹ ਕਿਸੇ ਹਿੰਸਕ ਅਪਰਾਧ ਦਾ ਸ਼ਿਕਾਰ ਹੋਏ ਹਨ।ਅਮਰੀਕੀ ਕਾਨੂੰਨ ਮੁਤਾਬਕ, ਜੇਕਰ ਕੋਈ ਵਿਅਕਤੀ ਕਿਸੇ ਗੰਭੀਰ ਅਪਰਾਧ ਦਾ ਸ਼ਿਕਾਰ ਹੁੰਦਾ ਹੈ ਅਤੇ ਜਾਂਚ ਵਿੱਚ ਪੁਲਿਸ ਦੀ ਮਦਦ ਕਰਦਾ ਹੈ ਤਾਂ ਉਹ ‘U ਵੀਜ਼ਾ’ ਲਈ ਅਪਲਾਈ ਕਰ ਸਕਦਾ ਹੈ।U ਵੀਜ਼ਾ ਉਨ੍ਹਾਂ ਲੋਕਾਂ ਨੂੰ ਦਿੱਤਾ ਜਾਂਦਾ ਹੈ ਜਿਨ੍ਹਾਂ ਨੇ ਅਮਰੀਕਾ ਵਿੱਚ ਮਾਨਸਿਕ ਜਾਂ ਸਰੀਰਕ ਸ਼ੋਸ਼ਣ ਸਹਿਣ ਕੀਤਾ ਹੋਵੇ ਅਤੇ ਜੋ ਅਪਰਾਧਿਕ ਗਤੀਵਿਧੀਆਂ ਦੀ ਜਾਂਚ ਵਿੱਚ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੀ ਸਹਾਇਤਾ ਕਰਦੇ ਹਨ। ਮੁਲਜ਼ਮਾਂ ਨੇ ਇਸੇ ਕਾਨੂੰਨੀ ਨਿਯਮ ਦਾ ਫਾਇਦਾ ਉਠਾ ਕੇ ਫਰਜ਼ੀਵਾੜਾ ਕਰਨ ਦੀ ਕੋਸ਼ਿਸ਼ ਕੀਤੀ। ਅਮਰੀਕੀ ਏਜੰਸੀਆਂ ਹੁਣ ਇਸ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀਆਂ ਹਨ ਤਾਂ ਜੋ ਇਸ ਨੈੱਟਵਰਕ ਦੇ ਹੋਰ ਮੈਂਬਰਾਂ ਦਾ ਪਤਾ ਲਗਾਇਆ ਜਾ ਸਕੇ।